Бии-Хем кожууннуң Аржаан сумунуң девискээринге оът-сигенниң үнүжү бо чайын багай эвес болган. Сигенни келир кыштаглаашкын үезинде мал-маганга четчир кылдыр белеткеп алыр арганы оран-таңды хайырлаан. Ону долузу-биле ажыглаар дээш, Аржаанның чурттакчылары бо хүннерде кызымак ажылдап турар.
«Чаа сорук» төлевилелдиң 2020 чылда киржикчизи Буян Адышаа, тускай шериг операция үезинде балыглаткаш, кадыының байдалын быжыктырып эмнеткен соонда, чанып келген. Ажыл-ишчи эр дораан-на ажыл-агыйынче шымнып кирген. Буян Олегович сигенни мал-маганынга хөйнү белеткеп алыр дээш, шалыпкын ажылдап турар.
Ол-ла Аржаан сумуда Айдаш Михайлович биле Азиана Киим-ооловна Ойдуптар «Аныяк өг-бүлеге – кыштаг» төлевилелдиң 2020 чылда киржикчилери. Айдаш мал-маганга чажындан-на чаңчыккан, малчын кижиниң ажылын эки билир, ада-иезиниң ажыл-ижин салгаан малчын. Ажыл-агыйжы өг-бүле мал чеминиң белеткелин шалыпкын чорудуп турар. Оларга өөреникчи ажы-төлү чайгы дыштанылга үезинде дузалажып, аалында ажылдарны кылып, мал-маганны кадарып, сиген кезилдезинге киржип турар.
Ш. ЛОПСАН.
Чуруктарны социал четкилерден хоолгалаан.
"Шын" №62 2024 чылдың август 17
Аржаан сумуда
17 августа 2024
12