Август 16 – 19 хүннеринде Тывага “Азия төвүнде хөөмей” деп IV дугаар Делегей чергелиг фестиваль болуп эртер дугайында Тыва үндезин культура төвү дыңнаткан.
2018 чылда ук фестиваль Россияның “Чылдың тергиин дээн 200 болуушкуннары” деп даңзыже кирген турган. Бо чылын хөөмей фестивалын тоолчураан тыва хөөмейжи Конгар-оол Ондарның 60 харлаанынга тураскаадып эрттирер.
Фестивальды эрттиреринге Президентиниң культурлуг эгелекчи бодалдар фондузунуң тургусканы Россия Федерациязының Президентизиниң грантызы улуг дузаны чедирген. 2015, 2017 болгаш 2019 чылдарда эрттирген Хөөмей фестивалы Россияның бир онзагай дээн культурлуг болуушкуну болу берген. Сөөлгү фестивальга даштыкы 15 күрүнеден база Россияның 30 регионундан төлээлер келгеш, киришкен болуп турар.
Ук фестивальга хөөмей-сыгыттың салым-чаяанныг күүседикчилерни деткиир сорулга салдынган. Мөөрей дараазында номинацияларга эртер:
- Чаңгыстың чаңчыл болган күүселдези
- Чаңчыл болган ансамбль
- Чаа шагның хөөмей күүселдези
- Онлайн-хөөмей
- Онлайн-хөөмейге чүгле даштыкы чурттардан киржикчилер киржип болур. Бир күүседикчиге-ле 5 минута үени бээри көрдүнген.
Фестивальга онзагай салым-чаяанныг чаа-чаа күүседикчилер илереттинип келири чугаажок.
Бүгү херек медээлерни +7 394-22-2-35-71 дугаарлыг телефон дамчыштыр азы ctyva@yandex.ru деп электроннуг почтадан билип ап болур.
Бистиң корр.
Чурукту интернет четкизинден алган.