Тываның Баштыңы Владислав Ховалыг социал четкилерде бодунуң блогунда сөөлгү каш айларда российжи регионнарның арга-арыг албанының база федералдыг Авиа арга-арыг камгалалының специалистери республикага чурттавышаан, тайга-таскыл берге черлерде өрттерни өжүреринге тыва коллегаларынга дыка улуг дузаны көргүскени дээш четтиргенин илереткен.
«Бо чайның кончуг изиинде арга-арыг өрттерин өжүржүрүнге биске дузалажыры-биле Тывада келген өске регионнарның шупту командаларынга четтиргеним илередип тур мен. Бөгүн олар чаныпканнар» – деп, Владислав Ховалыг дыңнаткан.
Тывада арга-арыг өрттерин өжүржүрүнге 260 ажыг кижи: Красноярскының арга-арыгны агаардан болгаш черден камгалаар баазаның, Томск, Новосибирск база Забайкальениң арга-арыгны агаардан камгалаар баазаларының, «Хакасияның арга-арыглары» автономнуг албан чериниң специалистери, Бурятия база Иркутск облазының «Авиа арга-арыг камгалалының" федералдыг курлавырының ажылдакчылары киришкенин сагындыраал. 30 авиадесантылардан тургустунган бирги бөлүк Красноярскыдан август 8-те ужуп келген дораан-на, Таңдының арга-арыг ажыл-агыйында ийи улуг өрттерни өжүржүп эгелээн. Август 30–31-де сөөлгү келген краснояржылар – 80 кижини аңгы-аңгы черлерже хувааган.
Сентябрьда өртчүлерге агаар-бойдус дузалаан, дагларда эң берге өрттерни база Таңды кожуунда Марачёвка чоогунда өрттү өжүрген. Бөгүннүү-биле алырга, арткан беш өрттү: Таңдыда Бай-Хаактан мурнуу-барыын талаже 12 база 18 км-де ийи, Кызыл кожуунда Баян-Колдан соңгу-чөөн талада 32 км-да, Каа-Хем кожуунда Катазы арбандан 23 км-де, база Кагжирба чурттакчылыг черден 39 км-де өрттү өжүрериниң кырында келген. Оларны бо хонуктарда өжүрүптер. 126 өртчү чана берген. Өрт-биле демиселдиң кончуг дээн үезинде 600 ажыг кижи киржип турганын сагындыраал.
Метеорологтар бо чоокку ийи хонукта Тывага чаъс чаарын, чер-черлерге өл хар дүжерин аазаан. Ооң-биле кады дүне агаарның температуразы бадар, оруктарга тайгактаар чадавас.
Республиканың Арга-арыг яамызы арга-арыг өрттери чавырылганы-биле девискээрлерде муниципалдыг деңнелдиг онза байдал чурумун соксадырын Таңды биле Каа-Хем кожуун чагыргаларынга сүмелээн. Ооң соонда арга-арыгларда республика чергелиг киирген онза байдалды ап кааптар. Регионда өртке удур онза байдал чуруму сентябрь төнчүзүнге чедир уламчылаар, ынчалза-даа ону кошкаткан: ам чурттакчы чон эрттирилге бижиктерлиг арга-арыгже кирип болур.
ТР-ниң Чазааның парлалга албаны.
Чурукту интернет четкизинден хоолгалаан.
“Шын” №71 2024 чылдың сентябрь 18