Республика найысылалы Кызыл хоорайда машиналарның хөйүн шуут кижи кайгаар. Харын-даа өскээртен келген улус Кызылывысты “чолаачылар хоорайы” дишкен-даа дижир чүве.
Дачада кылыр ужурлуг ажылдары хөй боорга, аңаа дузалаштырары-биле, элээн каш төрелдерин бир чолаачы “Москвичизинге” олуртуп алган. Улуг-Хемни кежилдир көвүрүгнү эрткеш, элээн бар чорда, КАИ ажылдакчызы шокар ыяжын көдүрүп, ону доктааткаш, чугаалаан:
– Машинаңарда артык ийи пассажирни чүге олуртуп алган силер? Машина башкарар документиңерни көргүзүңер!
Чолаачының арны агарып, хол-буду сириңейнип эгелезе-даа, боданган: “Берге байдалга таварышканда, девидеп черле болбас, ону ажып эртериниң аргазы ыяап-ла турар ужурлуг, ону дилээр апаар”.
– Хүндүлүг автоинспектор! Буруулуг болганымны силерниң мурнуңарга бир дугаар болгаш сөөлгү катап миннип тур мен, мени өршээп көрүңер ...
– Че, дүргедеңер, шимчээшкинге шаптыктап турарывысты көрүп тур силер ...
– Хүндүлүг, автоинспектор! Бир эвес мен силерни бо дораан каттыртыптар азы хүлүмзүртүптер болзумза, мени салып чорудуптар силер бе?
Автоинспектор элдепсине берген: чурум үрээн чолаачы барып-барып ону, автоинспекция ажылдакчызын, канчап хүлүмзүртүптер чүвел?
– Че, ындыг-дыр, шенеп көрем.
Чолаачы ону машиназының артыы талазында чүък сугар багажнигинге эдертип эккелгеш, оозун ажыдыптарга, ында база бир пассажир шупту боду доозун апарган, чүгле ийи караа кылаңнаар, ол хирезинде автоинспекторже хүлүмзүрүп алган бо чыткан! Автоинспекция ажылдакчызы ындыг чүүлдү бир дугаар көргени ол. Шынап-ла, хүлүмзүрүпкен!
– Че, дүрген моон ырап чоруй бар, моон соңгаар ындыг мугулай чорук кылба – дээш, КАИ ажылдакчызы оозун хүлүмзүрүг болгаш сезиг-биле салып чорудупкан. “Сөглээн сөс, керткен ыяш” деп чүве ол ыйнаан.
/ Маадыр-оол Калчан.
“Шын” №5 2026 чылдың февраль 12