Автооруктарның тудуу болгаш чаартылгазы республиканың Чазааның мурнады көөр угланыышкыны болуп артпышаан дээрзин Тываның Баштыңы Владислав Ховалыг дыңнаткан.
Бо чылын орук адырының акшаландырыышкынының ниити хемчээли 2,2 млрд ажыг рубль болур. Акша-хөреңгини федералдыг бюджеттен болгаш Тыва Республиканың Орук фондузундан үндүрүп берген.
700 сая хире рубльди «Айыыл чок болгаш шынарлыг автооруктар» деп Президентиниң национал төлевилелиниң боттанылгазынче углаар дээрзин Владислав Ховалыг медеглээн.
«Онза кичээнгейни чер оруктарже, көвүрүглерже углап турар, ынаар 40 сая хире рубльди углаар. Муниципалдыг автооруктарны экижидеринче 200 сая хире рубльди тускайлаан» — деп, Тываның Баштыңы демдеглээн.
Ол ышкаш бо чылын Кызыл хоорайның 14 кудумчузунда оруктарның септелгезин чорудар. Республиканың Баштыңы Тываның Орук болгаш транспорт яамызынга септелге ажылдарының дугайында чонну калбаа-биле медеглээрин дааскан.
А. ХЕРТЕК белеткээн.
Чуруктарны интернет четкизинден алган.
“Шын” №36 2024 чылдың май 18