“Культура” национал төлевил ёзугаар Тывага шимчеп чоруур ийи автотөптерни тускайлап берген. Шимчеп чоруур автотөптер дээрге-ле концерттер, чогаадыкчы ужуражылгалар, байырлалдар дээш янзы-бүрү культура-массалыг хемчеглерни суурларга, тараажы турлагларга, малчын аалдарга дээш өске-даа черлерге организастап эрттирип болурунга таарыштыр дериттинген автобустар-дыр. Ол автотөптерде чада тургузуптар сцена, ону каастап чырыдар, хөгжүмнү чыылганнарга дыңнадыр, киноларны болгаш чуруктарны көргүзер шупту дериг-херексел бар.
Совет үеде мындыг хевирлиг автотөптерни “автоклубтар” деп адап турган. Амгы үениң автотөптери ышкаш кылдыр дериттинмээн-даа болза, совет автоклубтар кончуг шимченгир культура одаа болгаш, кадыр-берт, ырак-узак дээш кайда-даа турлагларга, чайлагларга, аржааннарга чеде бээр. Автоклубтарның артистери кээрин ажыл-ишчилер дыка манаар чорааннар. Олар чедип кээрге, ыр-шоору, каткы-хөг чаңгыланып-ла үнер. Ажыл-ишчилер артистерниң ыр-шоорун дыңнап, танцы-самын магадап, киноларны көрүп, мага хандыр дыштанып алыр.
Бо чылын келген автотөптерни Таңды биле Каа-Хем кожууннарның культура килдистеринге берген. Бо кожууннарда ниитизи-биле чурттакчылыг 30 чер бар. Таңдының, Каа-Хемниң культура ажылдакчылары ол черлерге чедип, оларның чурттакчыларынга солун программаларны, кино-концерттерни көргүзүп, боттарының уран талантызын бараалгадыр аргалыг болурлар.
Эрткен 2022 чылда Эрзин, Барыын-Хемчик, Бай-Тайга болгаш Кызыл кожууннарның культура килдистери автотөптерни алганнар. Автотөптерниң ажык-дүжүүн культура ажылдакчылары болгаш тус-тус черлерниң чурттакчылары бедии-биле үнелээн.
ТР-ниң Культура яамызының медээлеринден.