Бо хүннерде Москва хоорайда «Твой ход» деп Бүгү-российжи студентилер шуулганы эгелээн. Шуулган үезинде Россияның национал шаңналы «Чылдың студентизи – 2022» мөөрейни база түңнеп турар.
Мөөрейниң регионалдыг чадазының шылгалдаларын төлептиг эрткеш, түңнел чадазында келген киржикчилерниң аразында Тываның көдээ ажыл-агый техникумунуң студентизи Аялга Ламажык база бар.
Мөөрейниң программазында бодун болгаш талантызын таныштырары, янзы-бүрү оюннарлыг хемчеглер киржикчилерни манап турар.
Студентилер аразында аңгы-аңгы номинацияларның шылгалдаларынга киржир болгаш «Чылдың студентизи» деп ат дээш адаан-мөөрей чоруп турар.
«Чылдың студентизи» – өөредилгезинде эртем, спорт, чогаадыкчы база хөй-ниитижи чедиишкиннерлиг сургуулдар аразынга онзагай мөөрей болгаш өөредилгелиг төлевилел-дир. Бо чылын түңнел оюнда чурттуң 70 регионундан 1000 ажыг студентилер киржип турар.
ТР-ниң Өөредилге яамызының медээлеринден.
Аялга Ламажык – Тываны төлээлээр
18 декабря 2022
40