«Кызыл-Гранд-Отель болгаш СПА» аалчылар бажыңынга Делегейниң туризм хүнүнге тураскааткан «Аян-Чорук– 2024» республика чергелиг шуулган бир дугаар болуп эрткен. Шуулган туризм адырының тѳлээлеринге арга-дуржулгазын солчур, үре-түңнелдиг чугаалажыышкын кылыр, ѳѳренир шѳлчүгеш болган.
Тываның Чазааның Даргазы Владислав Ховалыгның ѳмүнээзинден
шуулган киржикчилеринге профессионал байырлалы-биле байыр чедирип Чазак Даргазының экономика талазы-биле бирги оралакчызының хүлээлгезин күүседип турар Мерген Хомушку сѳс алган. Ол бодунуң илеткелинге бо хүннүң байдалы-биле туризм адырын сайзырадыр кол угланыышкын дээрге-ле бо адырга хамаарышкан сайгарлыкчы чорукту деткиири болгаш шынарлыг, чогаадыкчы туризм инфраструктуразын тургузары, Тываның турисчи арнын бедик деңнелче үндүрер шыырак кадрларны белеткээри деп демдеглээн. «Тываның Чазаа туризм инфраструктуразын болгаш ол адырга ачы-дуза чедирилгезин чижилгелиг кылдыр экижидип ажылдап турар. Сѳѳлгү 3 чылда бо адырга сайгарлыкчылар саны 60% ѳскен, тѳлевирлиг ачы-дуза чедирилгезиниң тѳлевири болгаш ооң үндүрүү 30%-га ѳскен. Бо чылдың бирги чартык чылында Тываже кээп турар туристерниң саны кѳзүлдүр-ле кѳвүдеп келген» – деп, Мерген Хомушку дыңнаткан.
Хемчегниң кол сорулгазы – Тыва иштинге эптиг болгаш айыыл чок аян-чорук кылырынга тренд тургузары. Шуулганга туризмни сайзырадырының айтырыгларын шиитпирлежип, арга-сүмени кадары-биле РФ-тиң Экономиктиг сайзырал яамызының «Туризм болгаш аңаа хамаарышкан ачы-дуза чедирилгези» стандартты тыпсыр ТК-401 кежигүнү Людмила Сафронова, Санкт-Петербургта «Звезды Отелям» КХН-ниң чиңгине директору Лилия Биткулова болгаш Бурят Республиканың туризм сайыдының оралакчызы Баярма Цыдыпова киришкеннер.
ТР-ниң Туризм агентилелиниң директорунуң оралакчызы Айзана Сакактың дыңнадып турары-биле, Тывада туризм сѳѳлгү үеде бурунгаар сайзыралды ап турар. 2021 чылдан тура күрүне деткимчези-биле 20 бааза ажыттынган, 3 пляж болгаш «Тыва Инкогнито» деп сертификаттыг бренд маршруду тургустунган. Тываны таварып эртер «Сибирьниң дыштанылгалары» маршрут база ажылдаан, ам-даа уламчылаар. Социал-экономиктиг тускай хѳгжүлде программазының шугуму-биле күрүне деткимчезин 19 тѳлевилел алган, национал тѳлевилел деткимчези-биле Тос-Булакче чырык киирер ажылдар чоруп турар.
Тывада бо шуулган бир дугаар эртип турар. Ооң эрттирикчилери келир үеде туризмниң сайзыралы улам күштелир болгаш бедик мергежилдиг эксперттерни хѳйү-биле хаара тудар деп санап турарлар.
ТМГ медээлер агентилелинден Н.КУУЛАР белеткээн.
“Шын” №75 2024 чылдың октябрь 2