Эргек-Дыргак тайгаларын
Ээн кагбайн чору-ла бис.
Сыннар бажын чыскаап алган
Саян ында база чыдар.
Чалымнарже аян-чоруктуң эгези эртенгиниң 5 шак 30-де эгелээн. Чыглып келген аян-чорукчуларның аразындан ылгалып турар Совет үениң туристери – 60 хар ажып турар угбаларывыс бар.
Кокпаның эгезинге чыглып, таныжып, шайлап алгаш, Саян сыннарының уунче шууштур базыптывыс. Бисти эдертип чоруур ийи орук айтыкчылары мурнай-соңнай ыры-шоорлуг чоруп орлар.
Баштайгы доктааган черивис "Саян сынының шурузу" деп шайлааракка амданныг тайга оъдундан хайындырган чулук шайын ижип аартадывыс. Улаштыр Челээштиг хөлдүң эриинде астына берген 270 тонна ажыг дашче көрүп, магадап тырттыржып турдувус. Кокпаны улаштыр демир чадалар-биле пөштүг, чойганныг чаагай чыттыг эзимче шөйлүп үнүптүвүс. Манаанывыс Астынган Даш мурнувуста чалым хыйыында арны көстүп келди. Чоннуң хөйүн, бистиң-биле чоруур аныяк-өскен колдуу-ла чээрби ажыг харлыг чалыылар. Оларның арын-шырайында өөрүшкүнүң хүлүмзүрүү чайнаан, аас-кежик долган.
Дараазында Кара-Хөл эриинге дүъштеки чемивисти чип, эштип алгаш-ла, орук-кокпавыстың чедер черинче углай, көк-көк хорум кырлап үнүптүвүс. Чалымнар эдээнде Артыш хөлге амырап эжиндивис, далай деңнелинден 1700 бедикте хөлдүң бырлаңынга ойнап, чашкы шаавысты сагындывыс. Аныяктардан дудак чок, Чурукчулар хертежинче үнүп, талыгырда турар шыпшыктарны магадап көрүп турдувус.
Парабола, Улунуң азыг дижи, Динозавр, Курсантылар болгаш Куш аттыг шыпшыктар баарывыста делгеттинген. Удатпаанда сырын-биле катчып, Красноярск деп аттыг хертештиг кадыр бедиинден Саян сынының бажынче углай шуужуп бадыптывыс-ла. Тайга тазы, көгү-биле уткуп, караңгы ногаан эзими-биле хөлгелеривиске эккеп үдеди. Аныяк-өскенниң спортче хандыкшылы, кадыкшылын амдыгааштан кадагалап чорууру өөрүнчүг-дүр.
Алексей ХОЮГБАН.
Авторнуң тырттырган чуруктары.
“Шын” №28 2025 чылдың июль 24