Тывада Садыг-үлетпүр палатазының удуртукчузу Аяс Мөңге өскүстерге бажың тударынга хамаарышкан айтырыгга бодунуң бодалы-биле үлешкен:
“Бажың айтырыы бистиң республикавыска черле шиитпирлеттинери белен эвес айтырыгларның бирээзи турган болгай. Чыккылама сооктуг, кааң изиглиг Тывавыска бажың тудары – харыысалгалыг ажыл. Ооң кадында тудуг материалдарының хандырылгазы база берге, өртек-үнеге үзер, бажың тударда, чугула херек инженер четкилерин кожары база аңгы айтырыг. Өскүс ажы-төлдү чурттаар оран-сава-биле хандырар айтырыг чидии-биле тургустунуп келген ужуру ол. Ынчангаш бо хүнде кожуун-сумуларда өскүс ажы-төлге бажыңнар тудар ажылдың шапкынчып турарынга өөрүп турар мен. Бажың тударының бетинде шиитпирлээр ужурлуг документ-саавыр, инженер четкилеринге кожар дээн чергелиг айтырыгларны болур-чогууру-биле шиитпирлеп, бажың тудуун шынарлыг чорударынче кичээнгейни угландырып турар апарганын эскерип болур. Өскүстерниң эрге-ажыктарын камгалаар айтырыг бирги чергеге турар ужурлуг”.
В. Куулар белеткээн.