Россияда чырыдыышкын ажыл-чорудулгазын деткиир болгаш нептередиринче угланган «Билиг. Премия» мөөрейниң беш дугаар сезону эгелээн. Бүгү чурттан 300 ажыг төлээ бо чылын Эксперт чөвүлелиниң составынче кирген. Олар 15 аңгы номинацияга федералдыг кыска даңзыны тургузуп, чурттуң субъектилеринден эң эки чырыдыкчыны болгаш чырыдыышкын төлевилелин шилиир.
А.Б. Чыргал-оол аттыг Кызылдың уран чүүл колледжизиниң башкызы, культурология эртемнериниң кандидады Аяслана Кара-Сал Эксперт чөвүлелиниң кежигүнүнче кирген. Чуртта чырыдыышкын ажыл-чорудулгазының шынарын бедидеринче болгаш патриотчу бот-идепкейлерни деткииринче «Билиг. Премия» улуг үлүг-хуузун киирип турар деп, ол демдеглээн.
«Мөөрейге 18 муң ажыг чагыгларны алган, оларның санында Тыва Республикадан 100 чырыдыкчы бар. Амгы үеде чагыглар сайгарылгазы чоруп турар, удавас 2025 чылдың шаңналынче эрткен кордакчыларның аттары билдине бээр» — деп, Аяслана Кара-Сал чугаалаан.
Эксперт чөвүлелинде чүгле культура болгаш өөредилге адырындан төлээлер эвес, а экономика болгаш үлетпүр талазы-биле специалистер база кирген. Чөвүлелди төлээлээн организациялар аразында ачы-буянныг чоруктуң болгаш бот-боттарынга дузалажырының үнелиг чүүлдерин идепкейлиг суртаалдап чоруур тускай шериг операциязының хоочуннарының каттыжыышкыннары, эки турачы бөлүктер болгаш өске-даа патриотчу организациялар бар.
Чөвүлелдиң ниити сорулгазы – бодунуң талазындан хамаатыларның социал идепкейжи чоруун хөгжүдеринге идигни берип чоруур салым-чаяанныг дагдыныкчыларны илередип, оларны деткиири болур.
Чөвүлелде беш эксперт чагыг бүрүзүн сайгарып, үнелел салырының боттуг системазын ажыглап турар. Чүгле чаңгыс чагыг киирикчизи регионун төлээлээр апаар. Ол чүүл кандыг-даа чаңгыс талалаар чорукту чок кылып, бүгү чурттуң аңгы-аңгы булуңнарының арга-дуржулга солчулгазын хандырар аргалыг деп, Россияның «Билиглер» ниитилели дыңнаткан.
ТР-ниң Чазааның парлалга албаны.
«Шын» №41 2025 чылдың октябрь 23