Ажы-төлүм чедиишкини — мээң чоргааралым

Чыл кандыг эрткенил?
Чөөн-Хемчик кожууннуң Чадаана хоорайда «Родничок» уруглар садының кижизидикчи башкызы Чочагай Ондар:

– 2023 Кодан чылы бистиң өг-бүлевиске ажыл-хожул-даа, акша-төгерик-даа талазы-биле «дүжүткүр», эки үре-түңнелдиг чыл болду. Чыл эгезинде «Кижизидикчи башкы – 2023» кожуун чергелиг мөөрейге киришкеш, «Чүлдү-чүрээмни чаштарга» деп номинацияның шаңналын алыр аас-кежиктиг болдум. Ажылымга чедиишкиним дээрге-ле, чаштарга бердингеним, оларга мээң ынакшылым деп санаар мен. Бир эвес өөредип чоруур чаштарым өзүп, сайзырап, шупту талазы-биле чедиишкиннерлиг, кижизиг кижилер болур болза, ажылымның үре-түңнели ол болур.

База бир өөрүшкүм, улуг кызым Амита школаны дооскаш, Омск хоорайның медицина колледжинче дужаап кирип алган. Ие кижиге ажы-төлүн школа доостуруп, эртем-билиг чедирип алыры дег аас-кежик кайда боор. Чадаана хоорайның 3 дугаар школазының 8-ки классчызы оглумнуң эки өөредилгезин ооң янзы-бүрү олимпиадаларга, мөөрейлерге киржип, эки үре-түңнелдиг, шаңналдыг черлерни ап чорууру бадыткап чоруур. Ажы-төлүмнүң чедиишкини – мээң чоргааралым.

Эрткен чылды үдеп, четтиргенивисти илередип, Улу чылында өг-бүлевисти өөрүшкүлүг чүүлдер манап турар деп идегел болгаш бүзүрел-биле 2024 чылды уткуп алырынга белен бис.

А. ОНДАР.

«Шын» №100 2023 чылдың декабрь 30