Тывада ачы-дуза негеттинип турар ажы-төлдүг өг-бүлелерге 834 сая рубльге күрүне деткимчези чедирттинген.
8-тен 17 хар чедир назылыг ажы-төлдү өстүрүп-кижизидип турар, орулгазы эвээш өг-бүлелерге Россияның Пенсия фондузунуң Тыва Республикада Эргелелин дамчыштыр 834 сая ажыг рубльга дузаламчы төлевирлерни берген. Шак ындыг деткимче төлевирлерни бо чылдың май айдан эгелеп Пенсия фондузу доктаадып турар апарган.
Саң-хөө байдалы берге, күрүнеден деткимче негеттинип турар деп санаттынган, эвээш акша-хөреңги орулга ап турар өг-бүлелерге күрүнениң талазында тускай адрестиг дузаламчызының дугайында чугаа чоруп турар. Ук дузаламчы акшаны алыр өг-бүлениң ортумаа-биле кижи санынга ап турар орулгазы регионда доктааттынган амыдырап-чурттаарынга чугула херек эң-не эвээш хемчээлден эртпес ужурлуг. Тывада ук хемчээл 14059 рубльге деңнежип турар. Оон аңгыда хууда өнчүзүнде шимчээр-шимчевес эт-хөреңгиниң бар-чогунга хамаарышкан тускай негелделер сагыттынган турар. А ада-ие улус бадыткаттынган орулгалыг турары азы орулга чок болуп турарының чөптүг чылдагаанын бадыткаан турары негеттинип турар. Ада- иениң ап турар орулгазының хемчээлинден чаа дузаламчы төлевирлерниң хемчээли дорт хамааржыр. Ол регионда амыдырап-чурттаарынга чугула херек эң-не эвээш хемчээлиниң 50, 75 азы 100-даа хуузунга деңнежип болур. Азы 6986, 10476 азы 13972 рубль бооп болур дээни ол.
Дузаламчы төлевир алыры-биле киирген билдириишкинни 10 ажыл хүнүнде сайгарып көөр. Төлевир бээринге ойталаан харыы келген болза, ук шиитпир хүлээп алдынганының соонда бир ажыл хүнүнүң дургузунда өг-бүле Күрүне ачы-дузазы порталында хууда кабинединге чогуур дыңнадыгны алган турар ужурлуг. Дузаламчы төлевирни чөпшээрээн болза, билдириишкинде айыттынган банкыда агар санче шиитпир хүлээп алганының соонда, 5 ажыл хүнүнүң дургузунда дузаламчы төлевир кирген турар.
Шак бо дузаламчы төлевирлерге хамаарышкан делгереңгей медээлерни Пенсия фондузунуң албан езу сайтызынче киргеш, номчуп, таныжып ап болур.
Бистиң корр.
Чурукту интернеттен алган.