Тываның күрүне университединиң ажык эжиктер хүнүнде Кызыл хоорайның база республиканың өөреникчилери, ортумак өөредилге черлериниң сургуулдары идепкейлиг киришкен.
Инженер-техниктиг факультеттиң тудуг болгаш коммунал ажыл-агый кафедразының улуг башкызы Буян Саая өөредилге-эртем лабораториязының тус черниң тудуг материалдары-биле таныштырылга ажылын кылган. Техниктиг эртемнерниң кандидады, доцент башкылары Александр Стрельников, Анай-Хаак Калдар-оол Кызыл хоорайның хөгжүлдезиниң, «Пор-Бажың», «Шагаан-Арыг», «Чадаана» бурунгу хоорайларының төөгүзүн фото-чуруктар, макеттер-биле база национал стильдиг чуртталга кварталының төлевилелин тайылбырлап бергеннер. Кафедраның дөрткү курузунуң ПГС-305 бөлүктүң студентилери Чаян Норла, Ай-Херел Куулар техникумнарның сургуулдарынга болгаш школачыларга Архикад программазында дизайнның эге билиглерин боттарының кылган ажылдары-биле келген аалчыларга тайылбырлааннар. Тудуг болгаш коммунал ажыл-агый кафедразының эргелекчизи Светлана Саая хемчегни эрттиреринге улуг үлүг-хуузун киирген.
Тудуг болгаш коммунал ажыл-агый кафедразының өөредилге-эртем лабораториязын, инженер-техниктиг факультеттиң музейин, тудуг талазы-биле тускай программалыг эртем аудиториязынга 290 хире школачылар келгеннер. Хемчег солун болгаш өөредиглиг болган.
Мындыг хевирлиг хемчеглер университеттиң башкылары болгаш студентилери-биле ужуражып, өөренип турар адырларының дугайында медээлерни алыр онзагай арганы бээр. Республиканың чаңгыс аай классиктиг университединче дужаап кирериниң негелделерин, өөредилге дугайында билип алыры мастер-класстарга, делгелгелерге, чаңгыс аай күрүне шылгалдазынга белеткенир талазы-биле консультацияларга киржири – бедик нарын айтырыгларны шиитпирлээринге, келир үеде сонуургалдыг мергежилин шын шилип алырынга улуг дузалыг.
/ Анай-Хаак Калдар-оол.
Авторнуң база Светлана Сааяның тырттырган чуруктары.
“Шын” №7 2026 чылдың февраль 26