Экскурсиялар, лекциялар, мастер-класстар болгаш роботтар. Тываның күрүне университединге январь 18-те ажык эжиктер хүнү болган.
Университеттиң бойдус-география факультеди “Ионнар делегейи” деп шөлчүгешти белеткээн. Химия кафедразының доцентизи Урана Ондар мастер-класстарга янзы-бүрү эзилдириглерге ионнарның шимчээшкиннерин көргүскен. Башкының холунга илби-шиди-биле дөмей янзы-бүрү дустар бичии реагент холуптарга, эстип, өңнерин өскертип, азы даш дег апарганын көргеш, школачылар магадап ханмааннар.
Физика-математика факультединиң информатика кафедразының башкызы Долаан Байыр “Интерактивтиг сайтының тургузуу” деп мастер-классты эрттирген. Интерактивтиг сайтка канчаар инфочурук, илеткелдер болгаш видео-таныштырылга чогаадып кылырын допчузу-биле көргүскен. Амгы үеде ажыктыг мастер-класска сонуургакпайларның талазындан айтырыглар көвей болган. Ол ышкаш улуг класстарның дилээ-биле янзы-бүрү программаларның эге чадазын таныштырган. Ийи дугаар курстуң студентизи Аганак Сиирин “ Векс” деп роботту бараалгаткан. Амгы шагның кайгамчык технологиязы янзы-бүрү кылдыныгларны күүседип турар. Бөдүүн шимчээшкиннерден эгелээш, студентилерниң чогаадып кылган нарын алгоритмнеринге чедир.
Ниитизи-биле муң ажыг школачылар болгаш профессионал ортумак өөредилге черлериниң сургуулдары ТывКУ-нуң ажык эжиктер хемчеглеринге киришкен.
Олча ОНДАР.
“Шын” №2 2025 чылдың январь 23