Келир үениң салгалдарын төрээн чуртунга ынак, ооң төөгүзүн эки билир, аңаа чоргаарланыр болгаш ооң келир үези дээш сагыш човангыр чорукка кижизидеринге янзы-бүрү адырларда ажылдап чоруур төлептиг кижилер-биле ужуражылгаларны эрттирери база бир дээштиг ажылдың бирээзи. Бистиң Ак сумузунуң Дөң-Терезин школазында патриотчу кижизидилгеже улуг сагыш салыышкынны кылып, янзы-бүрү адырларның ажылдакчыларын школавысче чалап, өөреникчилеривиске ажыктыг болгаш солун ужуражылгаларны эрттирип турар. Ужуражылгаларга өөреникчилер идепкейлиг киржип, боттарының сонуургаан айтырыгларын салып, чалаткан аалчыларны кичээнгейлиг дыңнаарлар.
Номга болгаш номчулгага уругларны хаара тудар болгаш ном номчуурунга улуг сонуургалды оттурар сорулга-биле чогаалчылар-биле ужуражылгаларны чорудары чаңчыл болу берген. Чогаалчыларның киржилгези-биле ыыткыр номчулгаларны чорудары база солун ажылдарның бирээзи.
Эрткен өөредилге чылында Тываның Чогаалчылар эвилелиниң кежигүннери – шүлүкчү, журналист чогаалчывыс Лидия Иргит, Россия Федерациязының өөредилге шугумунуң тергиини Римма Ооржак-биле солун ужуражылганы эрттирдивис. Ооң мурнунда чылын Тываның Чогаалчылар эвилелиниң кежигүннери Аяна база Аржаан Ооржакты ужуражылгаже чалап, чогаадыкчы ажыл-ижи-биле өөреникчилеривисти таныштырдывыс. Олар боттары тускай делгелгелерни делгеп, тайылбырлап, өөреникчилерниң улуг сонуургалын оттурганнар.
База бир солун ужуражылга Барыын-Хемчик кожууннуң Мажалык аттыг чечен чогаал каттыжыышкынының кежигүннери-биле болган. Ол ужуражылгага Ада-чурттуң камгалакчызының хүнүн таварыштыр Украинада тускай шериг операциязының киржикчизи, дайынның хоочуну Владлен Ооржактың база ус-шевер, алдын холдуг мажалыкчылар Чойганмаа Күжүгет биле Омак Ооржак оларның киржилгези-биле эрткен. Аалчылар Төрээн чурт дугайында кижи бүрүзүнүң төрээн чуртунга хамаарыштыр эрге-хүлээлгелериниң дугайында медереп билип, ону күүседириниң чугулазын өөреникчилеривиске тускайы-биле тайылбырлап бергеннер.
2024–2025 өөредилге чылында Ада-чурт камгалакчыларының хүнүн таварыштыр кожуунувуста ТШО киржикчилеринге тураскаадып, даргавыс Надежда Домбулактың удуртулгазы-биле база бир уттундурбас солун ужуражылганы эрттирдивис. Надежда Викторовна ажылының аайы-биле биске «Кара ирбиш» бөлүктүң база «Дайынчы ха-дуңмалышкы чорук» хөй-ниити организацияның удуртукчузу Айдыс Куулар баштаан дайынчы оолдарны чалап эккелген. Олар 55-ки мото-адыгжы (даг) бригаданың дайынчылары, тускай шериг операциязының киржикчилери. Дайынчы оолдарывыс-биле ужуражылга бистиң өөреникчилеривистиң келир үеже көрүүшкүнүнге улуг салдарлыг болган.
Кожуунда Иштики херектер яамызының аңгы-аңгы адырларының база өрт чериниң ажылдакчылары-биле чылдың-на ужуражылгаларны эрттирип, оларның солун беседаларын өөреникчилеривис дыңнап, хөй-ле ажыктыг чүүлдерни боттарынга шиңгээдип ап турарлар.
Чаа өөредилге чылында өөреникчилеривиске ажыктыг болгаш солун ужуражылгаларны эрттирерин уламчылаар бис.
/ Алдын-кыс ООРЖАК, библиотекарь башкы.
Чуруктарны Дөң-Терезин школазының сайтызындан алган.
“Шын” №45 2025 чылдың ноябрь 20