Илиирни аштаары
Температуразын өйлеп албайн, изиг илиир-биле бастынган түңнелинде илиир хүрең өртеңнерлиг апаар. Ону аштаарының эң чиик өртектиг аргазы бар. Бичии савага бир омааш ишти уксус, бир омааш ишти аммиак болгаш бир ампула суук аскорбин кислотазын холуптар. Резин хол-хаптарын кеткеш, чылыг илиирни хөвеңниг марля азы пөс-биле аштап кааптар. Илиир катап кылагар апаар.
Сөзүглелди балаары
Компьютерде сөзүглелди балаарда, backspace деп кнопканы базарга, чүгле чаңгыс үжүктеп балаттынар. А бир эвес ctrl биле backspace-ни иелдирзин деңге базар болза, бүдүн сөс балаттынар, ынчангаш дүрген болур.
Финик – ажыктыг үнүш
Бистиң садыгларывыста кат-чимис аразында көстүп келгилээн финик (финики) кижиниң мага-бодунга дыка ажыктыг. Эртенниң-не 4 финикти чип ап турар болза, кижиниң иммунитеди болгаш сөөк-даяа быжыгар, хан эргилдези болгаш чем хайылдырары экижиир. Кижиниң мага-бодунга демирниң (железо) деңнелин көдүрүп бээр. Чүрек аарыгларынга болгаш аллергияга удур туржур. Эң-не кол шынары – кижиниң иштинде янзы-бүрү маңгысталчак курттарны узуткаар.
Капуста чартыын соодукчуга шыгжаарда, кескен черин дус-биле чаапкаш, плёнка-биле дуглап каар болза, карарбас.
Чуруктарны интернеттен хоолгалаан.
«Шын» №39 2025 чылдың октябрь 9