Чыжырганадан кылган морсту үргүлчү ижерге чүү болур?
Кижи аныяксыыр. Чүге дизе чыжыргана кады А биле Е витаминнер-биле эң-не байлак. Ол кешти чаартырын дүргедедир, кургаарын эвээжедир, кеште балыгланган болгаш чарлып кургаан черлерни экижидер. Анаа эвес бо катты «чараш чүүлдүң кады» дээр.
Челбинерин болгаш кошкак иммунитетти шуут уттуптар силер. Чыжырганада С витамин лимондан 10 катап хөй! Ынчангаш организмниң камгалал күштерин быжыглаар, аараан соонда катап тургустунарынга дузалаар, кышкы үеде база сагыш-сеткил аарып турда, организмге деткимче бээр.
Дамырлар быжыгар, а чүрек оожургаар. Чыжырганада флавоноидтер дамырлар хууларын эвээжедир, хан эргилдезин экижидер, ол ышкаш «багай» холестеринниң деңнелин эвээжедир. Чүректиң ажылдаары дескилежир, хан базыышкыны турумчуур.
Диетологтар ишти-хырнында оюлганныг, гастрит, панкреатит аарыглыг база каттарга аллергиялыг кижилерге чыжыргана морузун сүмелевейн турар.
Ак дүктерни эвээжедири
Херек чүүлдер: 1 улуг шопулак ишти коньяк, 1 улуг шопулак ары чигири, 1 улуг шопулак касторка үзү, 1 чуурганың сарыг кезээ.
Кылыры: Бо чүүлдерни шуптузун холааш, баштың дөзүнге чаар. Баштың кежин эки нугуур. Дуглай бөрт кеткеш, 2 шак дургузунда тудар. Шампунь-биле чылыг сугга чуур.
Ындыг масканы неделяда 2 катап кылыр. 3-4 катап ону кылган соонда, ооң эки түңнелин эскериптер силер.
Эки хөөн көдүрер дизе чүнү чиир?
Чем дузазы-биле эки хөөн көдүрер дизе, дараазында «антидепрессант» чемнерни ажыглаңар:
Кара шоколад (какаозу 70 хуудан хөй) — эндорфиннер ажылдадырынга идиг бээр, ол ышкаш сагыш-сеткил оожургадыр магний база бар.
Банан — триптофан база В6 витамин-биле байлак.
Үстүг балык (лосось, скумбрия) — омега 3 дегдириишкинни болгаш дүвүрээзинни оожургадыр.
Чуурга — баш мээзиниң ажылдаарын экижидер холин база D витамин бар.
Сагыш-сеткилди оожургадыр «психологтуг» чем:
❆ Ары чигири холаан чылыг сүт.
❆ Каттар холаан сулалыг каша (овсянка) — углеводтар ханда чигирниң деңнелин турумчудар.
❆ Быштак (пармезан, чед- дер) — ооң тургузуунда фенилэтиламин таалап, оожургаарын сөңнээр.
А эң-не дүрген аргазы – мороженое (соок биле чигир — кончуг дүрген «антистресс»)
Үргүлчү багай хөөн организмде железо биле D витаминниң чедишпейн турарында дээрзин билип алыры артык эвес.
“Шын” №48 2025 чылдың декабрь 11