Россияның Президентизи Владимир Путинниң төрүттүнген хүнү – октябрьниң 7
Бөгүн, 2025 чылдың октябрьниң 7-де, бодунуң 73 харлаан хүнүнде Президент хөй байыр чедириишкиннерин хүлээп ап турза-даа, төрүттүнген хүнүн ажыл-херекчи байдалда эрттирип турар.
Федералдыг массалыг информация чепсектеринде медээлер ёзугаар алырга, Россия Федерациязының Айыыл чок чоруунуң талазы-биле чөвүлелдиң кежигүннери-биле оперативтиг хуралды Владимир Путин эрттирер. Президентиниң бөгүнгү ажыл-херекчи хүнүнде даштыкы күрүнелерниң удуртукчулары-биле телефон дамчыштыр чугаалажышкыннар база планнаттынган.
Төрүттүнген хүнүнде хөй байыр чедиишкиннеринге өөрүп четтиргенин илередип, харыылап четтигип турары-биле чергелештир Владимир Путин октябрь 7-ни чай чок ажыл-херектерге эрттирер чаңчылдыг. Эрткен чылын Президент төрүттүнген хүнүнде Россияның Айыыл чок чоруунуң талазы-биле чөвүлелдиң кежигүннери-биле хуралды видеохарылзаа дамчыштыр эрттиргеш, күрүнениң информастыг айыыл чогунуң айтырыгларын сайгарып чугаалашкан. Ол хуралга РФ-тиң Чазааның даргазы Михаил Мишустин, Россияның Айыыл чок чоруунуң талазы-биле чөвүлелдиң даргазының оралакчызы Дмитрий Медведев, Күрүне Думазының даргазы Вячеслав Володин, камгалал сайыды Андрей Белоусов, иштики херектер сайыды Владимир Колокольев олар киришкеннер.
Россия-биле эп-найыралдыг күрүнелер Казахстан биле Узбекстанның баштыңнары-биле ужуражыышкынны 2023 чылда төрүттүнген хүнүнде Президент эрттирген. Шавкат Мирзиеев биле Касым-Жомарт Токаев Россияның Президентизиниң Москва чоогунда резиденциязынга кээп чорааннар. Оларның ужуражыышкыны ажыл-агыйжы байдалга эрткен-даа болза, ооң соонда Владимир Путин: “Ынчан үжелээ октажыпкан бис” – деп баштактанып чугаалаан.
Чылдың-на октябрь 7-де күрүне деңнелдиг шупту айтырыгларны шиитпирлээн соонда эң чоок кижилери-биле төрүттүнген хүнүн Владимир Владимирович демдеглээр чаңчылдыг.
РФ-тиң массалыг информация чепсектериниң ажык медээлеринден.