Ажыл-ишке алдаржаан кижилер-биле кады

Аныяк-чалыы шаамдан ажылдап чорааш, кандыг омак-сергек, туруштуг, бурунгаар көрүштүг, ажылынга бердинген кижилерни көрбедим дээр.
Дыштанылга үезинде Шивилиг аржаанынга дыштанып, төрелдеримниң өөнге амыр-дыштыг аржаанга кирип, селгүүстеп, каттап турганымны утпас-тыр мен. Олар дээрге үе-дүптен мал-маган-биле халбактанчып келген Кызыл-Дагның хүндүлүг, хөрек сыңмас орден-медальдыг кадарчылары-ла болгай.

Бир хүн аржаанга сайыдым Дөжүлдей Бүрзүнейович биле Норбу дээр башкы келди. «Эр хей! Ажылдааның эки болганын демдеглеп, бо кадыкшылы кошкак акың агаарлыг чер Кара-Хөлге ажылдазын. Ам-даа аныяк-тыр сен, чүгле сеңээ бүзүрээр-дир мен. Кадыкшылга школазынга ажылдаар сен» – деп, эктимче часкавышаан, чугаалады.

Өгге шайлап, чемненип, элээн хөөрежип олурувуста, сайыт: «Бо аныяк кижини, коммунист боорга, кайы школада берге байдал барыл, ынаар чорудар-дыр мен. Чөптүг-даа, чөп чок-даа талалар бар» – деп чугаалады.

Сайыттың чугаазы чөп. Мен Бай-Тайга кожууннуң кайы-даа школазынга 35 чыл дургузунда ажылдап каапкан мен. Ол хире үе иштинде башкылап кээри берге-даа. Бодумнуң төрээн школам Бай-Тал ортумак школазы болгай. Ол школага ийи удаа директорлап ажылдадым.
Кайы-даа школага ажылдап чорааш, мээң сонуургаар чүүлүм – туризм. Ооң янзы-бүрү хевирлери. Шуйга, Кара-Хөлге, Бай-Талга чурт дугайында музейни тургузарынга улуг үлүг-хуумну киирген мен.

Күзел болгаш чүткүл турда, ажыл-агыйга бергелер турбас деп чүве ол-дур ийин. Эш-өөр көвейде, чону чоорган дээр ийикпе. Корабль дег 3 каът школага директорлап тургаш, 2011 чылда хүндүлүг дыштанылгаже үнген мен. Доостурган клазымның өөреникчилери үргүлчү меңээ кээп ужуражыр, хөөрежирлер. Ам бо үеде школаны септеп каан, чаражын! Суурувуста эң-не бедик бажың – школа.

/ Б.И. ДЕЛЕГ-ООЛ, күш-ажылдың хоочуну, РФ-тиң өөредилгезиниң тергиини.

"Шын" 2023 чылдың апрель 5 №24

#Шынсолун #Тыва #ШынныңПочтазы #БайТайга