Тывада, ылаңгыя, найысылал Кызылда, тудуг адыры калбаа-биле сайзырап турарын республиканың чурттакчы чону демдеглээн. Чаа-чаа чуртталга бажыңнарын, кожууннар, суурлар аразында база республикадан дашкаар оруктарны инженерлер, каңнакчылар, чазаныкчылар, тудугжулар, дашчылар дээш-ле оон-даа өске эң-не чугула херек мергежилдиг кижилер кылып турарлар. Олар эвес болза, бо бүгү хол-биле кылыр ажылдарны кымнар кылыр боор. Хүн бүрүде бистиң республикавыстың чаарттылгазынче, өзүлдезинче үлүг-хуузун олар киирип турарлар. Хоорай, суурларда тудугларның көвүдеп турарындан аңаа ажылдаар специалистер чедишпес.
Оларның ажылын хөйге билиндирери, нептередири-биле “Бастион” КХН бодунуң 15 чылдаанынга тураскаадып, журналистер болгаш блогерлер аразынга улуг хемчээлдиг “Бастион-пресс” деп мөөрейни чарлаар деп шиитпирлээн.
«Бастион» тудуг компаниязының директорунуң оралакчызы Александр Чижиковтуң чугаазы-биле алырга, мөөрейниң кол сорулгазы – Тывада ажылчын мергежилдерни нептередир болгаш дагдыныкчы чорукту кадагалап арттырары болур.
«15 чыл дургузунда бистиң компаниявыс бичии командадан 200 ажыг специалистерлиг бүдүрүлгеже хуула берген. Оларның аразында геологтар, инженерлер, электриктер, орук ажылдакчылары, чолаачылар болгаш янзы-бүрү тускай дериг-херекселдерниң машинистери бар. Чедиишкинниң үндезини кижилерде болгаш специалистерде дээрзин бодувустуң арга-дуржулгавыс-биле билир бис. Бистиң аныяктарывыс ажылчын мергежилдерже кичээнгейин угландырзын дээш, бо мөөрейни эрттирип, ооң дузазы-биле ажылчын мергежилдерни нептередир чаңчылды эгелээр күзелдиг бис» — деп, Александр Чижиков чугаалаан.
Компания оруктарны кылып, капитал септелгелерни, электри талазы-биле монтаж ажылдарын, геологтуг шинчилелдерни чорудуп, төлевилелдер кылырынга киржип турарын ол демдеглээн. Келир чылын «Бастион» асфальт-бетон бүдүрер заводту ажылдадыр деп планнап турар. Амгы үеде компания демир-бетон кылыгларын, дааранылга цегинде бодунуң ажылдарын кылып, соңгаларны болгаш инерциялыг материалдарны бүдүрүп турар.
/ Чыжыргана СААЯ.
Ада ТЮЛЮШТУҢ тырттырган чуруктары.
“Шын” №6 2026 чылдың февраль 19