Июнь 27-де бүгү чуртка «Россияда ажыл. Янзы-бүрү аргалар үези» деп Бүгү-российжи ажылчын олуттар ярмарказының федералдыг чадазы болуп эртер.
Кызылда ярмарканың кол шөлү– «Сүбедей» спорт комплекизи. Ол ышкаш июнь 27-де Тываның кожуун бүрүзүнге ярмаркаларны ажылдадыр.
Ярмарканың программазында:
- алды аңгы шөлчүгештер ажылын чорудар («Россияның ажылы» кадрлар төвү, ажыл берикчилериниң кезээ, өөредилгелер болгаш мөөрейлер, хууда ажыл-агыйлыг хамаатыларның продукциязының делгелгези болгаш садыглажылга);
- профориентация ёзугаар аныяктарга тускай техника делгелгези (өрт, шериг, эмчи, полиция);
- республиканың болгаш кожа-хелбээ регионнарның ажыл берикчилеринден хостуг олуттар таныштырылгазы.
Ажыл берикчилериниң аңгы-аңгы олуттар-биле таныштырылгазындан аңгыда, депшилге болгаш өзүлдеге хамаарышкан мастер-класстар база тренингтер болур. Эксперттер-биле консультантылар ажыл дилеп турар хамаатыларга келир үеде регионга кедилиг (перспективтиг) адырлар-биле таныштырар. Ылаңгыя келир үеде мергежилин чаа-ла шилип турар доозукчуларга болгаш студентилерге ажыктыг. Бо чылын ажыл ярмарказының шөлдеринге «Мергежилдер фестивалы» эртер. Аңаа аалчылар чүгле бөгүн негелделиг эвес, а келир үеде база ажыл рыногунга чугула херек мергежилдер-биле таныштырар.
Бүгү-российжи ярмарканың регионалдыг чадазы апрель 18-те эрткен, аңаа 7876 кижи ажыл олуттары-биле танышкан, оларның аразындан:
- ажыл-агыйже хаара туттунмаан 4107 хамааты;
- ТШО-нуң 301 хоочуну болгаш оларның өг-бүлелериниң кежигүннери;
- дээди болгаш ортумак профессионалдыг өөредилге черлериниң 1000 ажыг доозукчулары.
303 ажыл берикчизи 1871 хостуг олуттуг ярмаркага киришкен. Түңнелинде, ярмарка хүнүнде 563 хамааты ажылдаар саналды алган, дараазында неделя дургузунда 308 кижи ажылга тургустунган.
Бүгү-российжи ажылчын олуттар ярмарказы ажыктыын бадыткаан: 2023-2024 чылдарда 91 хемчегге 2504 кижи ажылдыг апарганнар.
Медээни болгаш чуруктарны Күш-ажыл болгаш социал политика яамызының арынындан алган.
“Шын” № 23 2025 чылдың июнь 19