Регион Чазаанга Тываның Баштыңы Владислав Ховалыг биле Моолдуң Кызыл хоорайда чаа чиңгине консулу Цэндсүрэн Охиндоонуң аразында ажылчын ужуражылга болган. Ийи тала кады ажылдажылгазының кол угланыышкыннарын сайгарган. Консул округунда Тыва, Алтай, Хакас республикалар база Алтай край кирип турар.
«Чиңгине консул-биле кады ажылдажылганың кол угланыышкыннарын сайгарып чугаалаштывыс. Бир дугаарында, Россиядан Тыва таварты Моол болгаш Кыдатче кызыгаарлар кежир транспорт төлевилелдери-дир. Цэндсүрэн Охиндоо Кызылче томуйлаттынган соонда, ол төлевилелдер дугайында дыңнаан эш-өөрүнден болгаш коллегаларындан, ооң иштинде даштыкыдан байыр чедириишкинин болгаш чагыгларны алганын чугаа- лаан» — деп, Владислав Ховалыг ужуражылга соонда бодунуң блогунда бижээн.
Цэндсүрэн Охиндоо бо чылдың апрельде Чимид Ганболдунуң орнунга консул округунуң удуртукчузу апарган. 1989 чылда Свердловскунуң даг институдунга алганы баштайгы эртеми-биле алырга, ол даг үлетпүрүнүң специализи. Дараазында магистратурага юрист эртемни чедип алган. Албан-дужаалга томуйладырының мурнунда Моолдуң даг-болбаазырадылга болгаш аар үлетпүр сайыдының оралакчызы болуп ажылдап турган. Ол албан-дужаалга Тываның Чазааның кежигүннери-биле кады ажылдап турган, арга-дуржулгалыг.
Россияның Даштыкы херектер яамызының саналы-биле Кызылда Моолдуң чиңгине консул чери 2001 чылдың ноябрьда ажыттынган. Чиңгине консул черин ажытканы-биле Тыва Республика биле Моолдуң аймактарының аразында садыг-экономиктиг, эртем болгаш гуманитарлыг харылзааларның шынары экижээн.
Тыва Республиканың Чазаа дугуржулгалар болгаш протоколдар күүселдези-биле Моолдуң 6 аймаа: Убсунур, Ховд, Завхан, Хувсугул, Архангай база Баян-Өлгий-биле кады ажылдап турар.
Өөредилге, культура, кадык камгалалы, садыг-саарылга, спорт база туризм талазы-биле регионнар аразында делегацияларның доктаамал солчулгазы болуп турар.
Тываның Чазаа 2025 чылда Моолдуң Завхан биле Убсунур аймактарның губернаторларын хүлээп алган. Тыва Республиканың Чазаа биле Убсунур аймактың чагыргазының аразында садыг-экономиктиг, эртем-техниктиг, социал-гуманитарлыг болгаш өске-даа адырларга кады ажылдажылга дугайында чаарттынган дугуржулгага атты салганнар.
Убсунур аймактың делегациязы Кызылга болуп эрткен Ада-чурттуң Улуг дайынынга Тиилелгениң 80 чыл оюнга тураскааткан хемчеглерге киришкен.
Моолдуң Төп кызыгаар камгалаар эргелелинден шериг албанныглар Май 9-та Кызылга болуп эрткен Тиилелге парадынга бир дугаар киришкеннер.
Бо неделяда, май 26-дан 29-ка чедир, Завхан аймактың Улиастай хоорайга Тыва Республиканың хүннери болуп эртер, программада ажыл-агыйжы болгаш культурлуг хемчеглер кирген. Тыва сайгарлыкчыларның болгаш улусчу ус-шеверлерниң бүдүрген барааннарының экспо-делгелгезин, сайгарлыкчыларның B2B ужуражылгаларын, Улиастай хоорайның орус дыл башкыларынга мастер-класстарны, Тиилелгениң 80 чылынга тураскааткан «Тыва Ада-чурттуң Улуг дайынының чылдарында» деп номнар делгелгезин болгаш фотогалереяны база В. Тока аттыг симфониктиг оркестрниң концерт программазын бараалгадыр.
А. МОНГУШ.
А. ЕНЗАКТЫҢ тырттырган чуруу.
“Шын” №20 2025 чылдың май 29