Найысылалдың кудумчуларында хөй каът бажыңнар тудуглары, чаъс соонда мөөгүлер дег, удаа-дараа көстүп кээп турары чурттакчы чонга өөрүнчүг.
Ында-мында хайныышкынныг ажыл-иш, тудуг техниказының шимээн-даажы бурунгаар сайзыралдың тыныжын берип турар. Хайымныг ажыл Ангар бульварында база чоруп турар. Ында «Восток» КХН чер иштинде машина тургузар черлиг 9 каът 5 бажыңны тудуп турар. Ол бажыңнар 5 дугаар школа дужунда. Ангар бульвары, 7 деп адрестиг тудугда бригаданы Чимит Норбу деп аныяк специалист удуртуп турар. Ол 2010 чылда Чаа-Хөл ортумак школазын дооскаш, шериг албан хүлээлгезин эрттирген соонда, Тываның күрүне университединиң Үлетпүр болгаш хамааты тудуг факультединче өөренип кирген. Улаштыр Кузбасстың күрүнениң техниктиг университединиң Стратегтиг удуртулганың экономиктиг факультединге магистр эртемни чедип алган. Студентилеп тургаш-ла, Чимит Норбу тудуг объектилеринге чайгы дыштанылгаларында ажылдап, практиктиг билиглер-биле чепсегленип турган. Бир дугаар ажылдаан чери – «Восход» КХН. Ооң директору Адыгжы Начынның удуртулгазы-биле Кызыл-Мажалыкта школа тудуунга киришкен. 2018 чылда дээди эртемниг аныяк специалист «ТР-ниң Амыдырал-хандырылга ажыл-агыйының Төлевилел-сметалыг бюро» деп күрүнениң унитарлыг бүдүрүлгезинге төлевилелдер кылыр инженер кылдыр ажылдап эгелээн. Арга-дуржулгазы бедик архитектор Михаил Кууларга удурткан албан черинден арга-дуржулгазын ужуктап алгаш, улаштыр «Өлчей» КХН-ге, Абакан хоорайда «Азия Бим Проект» КХН-ге ажылдап чоруй, 2023 чылдың сентябрьдан тура «Восток» КХН-де тудуг-монтаж ажылдарының мастери кылдыр ажылдап турар.
Чымыштыг ажыл-иш аразында аныяк тудугжу Норбу Чимит-биле хензиг када чугаалажыр аргалыг болган бис. Бүдүжү топтуг, чугаа-домаа оожум, айтырыглар салырга, кончуг кичээнгейлиг дыңнап алгаш, бичии-даа хөөредиг чокка харыылап бээр болду. Бо хүнде ажылдап чоруур коллективин үнелеп, кылып турар ажылынга харыысалгалыы-даа кончуг болду. Тудугда хаара туттунган звенолар бот-боттарынга дузалажып, демнежиптер, бистиң хүлээлгевис чүгле бо-дур, бодуңар кылып алыңар дээр хөөн кымда-даа чок. Понедельниктен субботага чедир кара эртенден орай кежээге чедир ажылдаар болгаш, ыңай-бээр чардыгар үе чок, чүгле чаңгыс дыштаныр хүнде бажыңга сагыш хандыр дыштанып алыр. Бичии тыптып кээр хостуг үезин база-ла ажылы-биле холбаарынга ынак: арга-мергежили, билиглери уттундура бербези-биле шыйдынар, чуруттунар, тускай программалар-биле компьютер артынга олуруптар. Ёзулуг тудуг инженери кижи саазын кырынга-даа, холу-биле-даа деңге кылыр болза эки, кайызын-даа эки сайгарары чугула деп Чимит санап турар. Аныяк инженер шилип алган мергежилинге хомудавайн турар. Чогум бичиизинден-не ол эрге-хоойлу камгалаар органнарга ажылдаксаар турганын чажырбады. Тудуг-суур кылырынга киириштирип чоруур үлүг-хуузун, кызымаккай ажылын, аныяк кижиниң чүткүлдүүн үнелеп көргеш, ТР-ниң Тудуг яамызы Норбу Чимитти баштай Өөрүп четтириишкин бижии-биле, ооң соонда Хүндүлел бижик-биле шаңнаан. Назы-хары аныяк бол, изин арттырган тудуглары арат чоннуң сеткилин өөртүп чоруур. Ол дээрге үстүнде адаттынган школадан аңгыда, Кызылдың 17 дугаар школазы, Авыйганда хоочуннар болгаш кадыы кызыгаарлыг улус интернады, Иркутская кудумчузунда 2 тос каът бажың-дыр. Амгы үеде Ангар бульварында тос каът бажың тудуунда шудургу ажылдап турар. Чырык угаанныг, алдын холдуг, шевер карактыг, ажылынга бердинген, харыысалгалыг, топтуг бүдүштүг аныяк тудугжу бо-ла хевээр даанган ажылынга ак сеткилдиг бараан болуп чоруур болза, күрүне шаңналдарының дээдизинге чедир ажылдаар арга болгаш үе мурнунда.
Идегел МОНГУШ белеткээн.
Чурукту маадырның хууда архивинден алган.
“Шын” №31 2025 чылдың август 14