“Азий диптиң төвүнде Хөөмей” фестиваль

Бөгүн Тыва үндезин культура төвүнге РФ-тиң алдарлыг артизи, Тываның Улустуң хөөмейжизи чораан Коңгар-оол Ондарның чырык адынга тураскааткан документалдыг фильмниң баштайгы көргүзүү болган.
Аңаа хөөмейжиниң өг-бүлези, чоок кижилери, дөргүл-төрели, билдингир культура ажылдакчылары болгаш эш-өөрү чыглып, чылыг сактыышкыннарны кылган.
ТР-ниң Культура болгаш туризм яамызының сайыды Виктор Чигжит сөс алгаш, “Азий диптиң төвүнде Хөөмей” фестивальды Коңгар-оол Ондарның 60 харлаан чырык адынга тураскаадып эрттирип турары – хөөмейжиге хүндүткелдиң демдээ деп чугаалаан. Тываның төлептиг оглу Коңгар-оол Борисовичиниң төрээн чонунуң хөөмей-сыгыдын алдаржыдарынга киирген улуг үлүг-хуузун бедии-биле үнелеп, ооң эгелээшкиннери-биле тыва хөгжүмчүлерниң ат-алдары делегейде чаңгыланып турар кылдыр бедээнин ол демдеглээн.
Чораан болза 60 харлаар турган алдарлыг хөөмейжиниң кыска назынында ооң чогаадыкчы ажыл-ижи, амыдырал-чуртталгазының дугайында допчузу-биле фильмде көргүскен.
Фильмни көргүзер мурнунда, ону кылган чогаадыкчы бөлүкке ТР-ниң Культура болгаш туризм яамызының хүндүлел бижиктерин сайыт тывыскан.

Тыва үндезин культура төвүнүң медээзи-биле.