Тываның хөй-ниитижилери Кызыл хоорайның Восток микрорайонунда АЗС тудуунуң дугайында айтырыгны көдүрүп, Улусчу фронтунуң Тывада салбырынга дилег киирген.
Хөй аал чурттаар бажыңнарның чанында чоокта чаа, алызында барып чүү болуру билдинмес, оран-сава туттунган. Ооң кадында ук тудуг газ-биле хандырылгада коштунган. Хензиг частырыг кылыр болза, газ кижилерниң амы-тынынга айыылды тургузуп болур деп тус черниң чурттакчылары санап турар.
Чоннуң дилээ-биле Улусчу фронтунуң Тывада салбырының төлээлери хыналданы чоруткан.
«Улусчу фронтунуң төлээлери-биле катай тус черниң чурттакчылары-биле чаа тудугнуң дугайында чугаалаштывыс. Аңаа АЗС турар деп кижи бүрүзү бадыткады. Чанында хөй аал чурттаар бажыңнар болгаш садыглар база чер бажыңнар бар. Бажыңнарның чамдыызы газта коштунган» – деп, Улусчу фронтунуң Тывада салбырының Аныяктар командазының координатору Дмитрий Зырянов чугаалады.
Хөй-ниитижилерниң тодаратканы-биле алырга, тус черниң хууда сайгарлыкчызы оран-сава тудуп турар черин Кызыл хоорай чагыргазындан хөй чылдарда арендага алган. Аренда керээзинде айытканы болза, аъш-чем садыы ажыдары турган. Ынчалза-даа хууда сайгарлыкчы Кызыл хоорай чагыргазындан садыг ажыдар дээш чөпшээрелди алгаш, элээн үе эрткенде, черниң ажыглалын өскертир дугайында билдириишкинни чагырга черинге катап база киирген болган.
«АЗС тудуп турар дээрге, дыка үр бүзүревейн турдум. Чоокта чаа бодум баргаш, көргеш, ынчан бүзүредим. Үш метр ханы котлован казып каан боорга, шынап-ла. АЗС ажыдар дээн-дир деп билдим. Чанында ыяш бажыңнар, садыглар бар болганда, хоойлуга канчап-даа дүүшпес тудуг-дур. Хоойлу езугаар бо черге АЗС тутпас ужурлуг. Микрорайоннуң чурттакчы чону бо тудуг дээш килеңнеп, хорадап тур бис. Ук айтырыгны шиитпирлеп бээрин дилээр-дир бис» – деп, тус черниң чурттакчызы Галина Некрасова чугаалаан.
Кызыл хоорай чагыргазы чоннуң дилээн кичээнгейге ап, ноябрь 22-де хөй-ниити дыңнаашкыннарын чарлаан. Ынчалза-даа ол үеге чедир АЗС ажыттына бээриниң магадылалы бар. Ол дээш чон дүвүреп турар.
АЗС-тиң кывар-чаар чүүл шыгжамыры чер адаанда болза, 25 метрден чоок черге турбас, а бир эвес чер кырында болза, 50 метр ырак черге турар ужурлуг дээрзин сагындыраал.
Айдың ОНДАР белеткээн.
Чуруктарны интернет четкизинден хоолгалаан.
«Шын» №82 2024 чылдың октябрь 26