Бөдүүн чазык ада-ием кызы болуп,
Бөдей өгге төрүттүнгеш өзүп келдим,
Мөгежени өттүр дегген хүннүң чырыы,
Бөгүнге дээр карактарга чуруттунар.
Суугуда одун салган ачам арны,
Сула чараш өрүп баткан авам чажы,
Пашта саарган сүттүг шайның чаагай чыды,
База хевээр сагыжымга кирип келир.
Өрү дээрже бүлгүрүлген чандаң ыжы,
Өртемчейге тарай эстээш чоорту чидип,
Өөрүп-хөглеп чүгүрүшкен чаштар үнү
Өжүп читпес, кулактарга дыңналып кээр.
Кодан малдыг кажааларлыг, аккыр өглүг,
Кончуг чараш чайлаавыста аалывыс,
Сагыжымда ол-ла хевээр чуруттунуп,
Сакпак адаан саргыдып кээр чиктиин але!
Бөдей өгге төрүттүнгеш өзүп келдим,
Бөдүүн ажык, чажыртынмас, сеткилим ак,
Бөгүн мында шорбарлааным одуруглар,
Мөңге болуп артып каар деп сөглевес мен...
18.05.2025 ч.
Розалия МОНГУШ.
Чурукту интернеттен хоолгалаан.
“Шын” №24 2025 чылдың июнь 26