Делгелгениң байырлыг ажыдыышкынынга ТР-ниң Чазак Даргазының оралакчызы Орлан Сарыглар, ТР-ниң эртем болгаш өөредилге сайыды Елена Хардикова, ТР-ниң культура сайыды Виктор Чигжит КПКУ-нуң удуртукчузу Уран-Кыс Ондар киришкен.
"КПКУ-нуң кижизиттирикчилери чурттуң бүгү шериг талазы-биле өөредилге черлеринде бистиң республикавысты төлептии-биле көргүзүп турар. Бо өөредилге чериниң кижизидилге болгаш өөредилге талазы-биле кылып чорудуп турар ажылдары бедик деңнелде дээрзиниң бадыткалы, доозукчуларның бедик баллдары. Ол бисти өөртүп турар. Башкылар болгаш ада-иелерге четтиргенивисти илередир-дир бис” — деп, Орлан Сарыглар демдеглээн.
ТР-ниң культура сайыды Виктор Чигжит бодунуң ээлчээнде, КПКУ биле яамы чоокта чаа кады ажылдажылганың дугуржулгазын чарганын чугаалааш, 10 чыл оюн демдеглеп турар өөредилге чери биле Культура яамызы келир үеде улуг ажылдарны кылып чорудар дээрзин дыңнаткан.
Чыылганнар КПКУ-нуң 10 чыл дургузунда чедиишкиннерин, медальдары, дипломнары, кубоктары болгаш аңгы-аңгы фестивальдарга киириштирген төлевилелдериниң дугайында болгаш кадеттерниң хол-биле кылган ажылдары – национал ойнаар-кыстар, самолеттар макеттери, чонар-даштан сиилбип кылган ажылдар, чураан чуруктар, скиф үениң стилинге кидистен, пордан янзы-бүрү кылыглар дээш өске-даа чүүлдерни делгелгеден сонуургап көрген.
Делгелгеге солун тайылбырны КПКУ-нуң 2024 чылдың доозукчузу Тэмучин Ооржак биле 9-ку классчы кадет Аюша Куулар база училищениң кижизидилге ажылының талазы-биле килдис эргелекчизи Наталья Нелюбина кылганнар.
Делгелге соонда, чыылганнарны коференц-залче чалааш, 9-ку классчы Салчинмаа Садыяжык кадеттерниң чогаадыкчы ажылдарының дугайында таныштырган. Ооң соонда Дагларым аттыг кадеттерниң чогаадыкчы каттыжыышкынының тырттырганы “Хөөмей — чоннуң сагыш-сеткили” деп барымдаалыг фильмниң көрүлдези болган.
“Российжи кадеттер чыскаалында 10 чыл” деп делгелге июнь 28-ке чедир уламчылаар.
Бистиң корр.
#TMG
#ТуваМедиаГрупп