“Тывамедиабөлүк” медээлер агентилели дээрге ниитилелге чырыдыышкын ажылын чорудуп турар албан черлериниң бирээзи. Чылдың-на демдеглеп эрттирип турар Парлалга хүнүнде оларның ажылын демдеглевес аргажок. Ында корреспондентилер кижилер-биле ужуражып, чугаалажып, чаа-чаа медээлерни чыып, парлап турар болганда, оларны чон билир. Үениң агымының аайы-биле чуртталга аажок дүрген чоруп турар апарган. Медээлерниң хөйүнден, корреспондентилер оларны чүгле бижип четтигер. А оларның артында ону хынаар редактор, интернет четкизинче үндүр салыр специалист база бар.
Демир Тимурович Куулар ук агентилелде корреспондентилерниң бижип эккелген медээлерин, кол редакторнуң хынаанының соонда, медээ бүрүзүнге чурукту шилип, номчуурунга эптиг, көрүштүг болзун дээш, чараштап каастааш, интернет четкизинче үндүр салып, номчукчулар-биле харылзааны тудуп турар. Агентилел сайтыда, ВКонтактеде, max-та, телеграмда, Одноклассникиде ажылдап турар.
Үжен хар ажып чоруур Демир Куулар боду алызындан оожум-топтуг бүдүштүг болгаш, аңаа ыржым-шыпшың черге ажылдаарга, кончуг таарымчалыг болган. Ол ооң мурнунда Кызыл кожууннуң культура эргелелинге хөй-ниити-биле харылзаа тудар специалист кылдыр ажылдап турган. Амгы үеде ол медээлер агентилелинде 4 чыл чеде берген, 5 дугаар чылынче кирипкен.
“Ажыл айтырып чедип кээримге, медээлер агентилелиниң кол редактору Ольга Возовикова турган. Чугаалажыышкын соонда неделя дургузунда стажировка эрткеш, ажылдай бердим. Ыржым-шыпшыңга ынак болгаш, бо ажыл меңээ кончуг таарымчалыг-дыр. Ажылдап турар коллективим база эп-найыралдыг аныяктар болганынга өөрүүр-дүр мен. Ынчангаш оларның аразынга бүгү назынымда-даа ажылдаарынга белен мен” – деп, ол чугаалаан.
Ол чогум-на туризм талазы-биле тускай эртемниг-даа болза, бодунуң сонуургалының болгаш ажылының аайы-биле информастыг технологиялар адырында билиглерин доктаамал бедидип, немей өөренип чоруур. Ооң ындыг шынзылгаларын санаар болза төнчү чок.
“Амгы үеде медээлер дендии дүрген чоруп турар болганда, үе-шаанда озалдатпайн, номчукчуларга дүрген четсин дээш ажылдап турар мен. Ол ышкаш өске коллегаларны мурнай салыптар дээш кызар мен” – деп, Демир демдеглээн.
Сөзүглелден аңгыда, чуруктар-биле ажылдаары база чогаадыкчы ажыл дээрзин ол чугаалаан: “Сөзүглелге тааржыр чурукту дилеп тыварынга база үе негеттинер. Үениң агымының аайы-биле “кылымал угаан” биске кончуг дузалыг апарган. Тааржыр чурук тывылбайн баарга, аңаа чурудуп алыр-дыр бис”.
Чыжыргана СААЯ.
Чурукту маадырның архивинден алган.
“Шын” №1 2026 чылдың январь 15