Тываның чурттакчылары «Россияның аныяктар төвү» база «Аныяктар хоорайы» деп аттар дээш бадылаашкында киржип турар сибирьжи кожаларын ам деткип болур.
Амгы үеде «Күрүне ачы-дузалары» порталында чоннуң бадылаашкыны чоруп турар. Кордакчылар санында Сибирьниң, шынап-ла, аныяк овур-хевирин көргүзүп турар Томск биле Шерегеш хоорайлар бар.
Томск – шапкын хөгжүп турар эртемниң болгаш инновацияларның төвү, студент аныяктарның найысылалы. Томск хоорайның 5-ки чурттакчызы-ла – студент. Хоорайда 6 федералдыг дээди өөредилге черлеринде делегейниң 97 чурттундан аныяктар өөренип турар. Делегей рейтингизинде Томск – аныяктарның амыдырап-чурттаарынга таарымчалыг байдалы-биле Россияның хоорайларының аразындан 3-кү черде турар. Ынчангаш «Аныяктар найысылалы» ат дээш бадылаашкында киржип турар.
Амгы үениң хоорай курорту Шерегеш – спортчу хей-аъттың база аныяктар шимчээшкининиң символу. Идепкейжи, талантылыг база чүткүлдүг улусту каттыштырган эгелээшкиннер ында төрүттүнүп турар. Шерегеш – бойдустуң каас-чаражы, амгы үениң аргалары болгаш аныяк салгалдың омак-сергээ каттышкан чер-дир. Ынчангаш ол «Аныяктар хоорайы» деп атче кордакчыларның бирээзи.
Мөөрей ийи кол негелделиг:
- ийи номинацияга кордакчыларны шилээн болзуңарза, чүгле ынчан үннү санаар;
- доктаамал бүрүткеткен регионуңарда хоорай дээш бадылап болбас.
Бадылаашкын 2025 чылдың декабрь 20-ге чедир уламчылаар. Бодуңарның үнүңерни маңаа берип болур силер: pos.gosuslugi.ru/lkp/polls/...
Аныяктар херектериниң талазы-биле федералдыг агентилел «Аныяктарның үези» бүгү-российжи премия-биле «Россияның аныяктар төвү» база «Аныяктар хоорайы» тускай шаңналдарны тыпсыр. Хоорайның болгаш регионнуң аныяктар политиказын сайзыраңгайжыдарынга ниитизи-биле көскү чедиишкиннерлиг болгаш улуг планнарлыг хоорайлар премияны алырлар.
«Россияның аныяктар төвү» база «Аныяктар хоорайы» эрге-байдалды аныяктарның бот-сайзыралынга чаа аргаларын ажыткан хоорайларга 1 чылда бээр. Тиилээн ол хоорайларның төлевилелдери федералдыг деткимчени ап, кол аныяктар шуулганнарын, фестивальдарны эрттирер.
Сибирьниң хоорайлары хөгжүлдениң чаа аргаларын болгаш чөптүг деткимчезин алыр кылдыр бо медээни эштериңер, чоок болгаш таныыр кижилериңер-биле үлежиңер.
ТР-ниң Чазааның парлалга албаны