Балтий далайның дүвү-биле Россиядан Европаже шөйүп чоруткан “Соңгу агым-1”, “Соңгу агым-2” газ хоолайларын чазылдырганы-биле холбаштыр Каттышкан Нациялар Организациязының Айыыл чок чорук чөвүлелин чыылдырарын Россия Федерациязы негээн. “Соңгу агым-1”, “Соңгу агым-2” газ хоолайларын чазылдырарынга Американың Каттышкан Штаттары биле Польша хамыктың мурнунда сонуургалдыг деп российжи үстүкү удуртулга медеглээн.
Бо хоолайларны чазылдырганындан Россия хөй когаралга таваржыр-даа болза, Россия боду чазылдыргаш, аңаа Европа чурттарын болгаш Американың Каттышкан Штаттарын буруудадып, чидиг шериг-политиктиг байдалды экономиктиг айтырыгларже чайылдырарын шенеп турар деп даштыкы политиктиг хайгааракчылар санап турар.
“Дания биле Швецияның садыг-экономиктиг зоназында “Соңгу агым-1”, “Соңгу агым-2” газ хоолайларының участоктарын чазылдырган, а ол күрүнелер дээрге НАТО-нуң кончуг шынчы талалакчылары-дыр. Дания биле Швеция Американың Каттышкан Штаттарының аспаанда” – деп, Россия Федерациязының Даштыкы херектер яамызының төлээзи Мария Захарова чугаалааш, газ хоолайларын чазылдырганынга АКШ сонуургалдыг деп айыткан.
“Соңгу агым-1”, “Соңгу агым-2” газ хоолайларын чазылдырганынга буруулуг таланы Россия биле российжи газка хереглели улуг Европа күрүнелери дилеп турар.
ЗАХАРОВА БУРУУДАТКАН
Американың Каттышкан Штаттарының президентизи Джо Байден Каттышкан Нациялар Организациязының Чиңгине Ассамблеязынга сөс алгаш, Президент В.Путин “ядролуг чепсекти ажыглаары-биле кыжанып турар” деп чугаалаан.
Россия Федерациязының Даштыкы херектер яамызының төлээзи Мария Захарова “ядролуг чепсекти ажыглаары-биле кыжанып турар” деп Джо Байденниң сөстери Владимир Путинни нүгүлдээни-дир деп медеглээн.
(Россияның информация агентилелдериниң ажык
медээлеринден белеткээн).
Бөмбүрзектиң судалы
1 октября 2022
99