Тываның Көдээ ажыл-агый яамызының медээлери-биле алырга, бо кыштың эгезинден бээр үеде бөрүлер 358 малче халдаан. 33 инекти, 207 хойну, 118 аътты бөрүлер чок кылган. Малче бөрүлерниң халдай бээриниң чылдагааннарының бирээзи – малды оларның ээлери одарларга кадарбайн турары. Бөрүлерниң малчыннарга чедирген когаралының ниити түңү 6 сая рубль хире.
Аңчылар, малчыннар бөрүлер-биле демиселди үргүлчү чорудуп турар. Сөөлгү каш хонуктарда олар 27 бөрүнү чок кылган.
Бөрүлер-биле демиселдиң янзы-бүрү хевирлерин республикада чорудуп турар. Бо чылын Өвүр кожуунда “Кожууннуң бөрү аңнаар эң эки аңчылар бригадазы” мөөрейни чарлаан. Эң хөй бөрүлерни чок кылган тиилекчи аңчылар бригадазын “Наадым–2026” байырлалынга шаңнаар.
Эрткен 2025 чылда “Эң эки бөрү аңчызы, эң эки бөрү аңчыларының бригадазы” мөөрейни Бии-Хем кожуунга эрттирген. Мөөрейниң түңнели-биле эң эки аңчыны 15 муң рубль, эң эки бөрү аңчыларының бригадазын 25 муң рубль акша-биле шаңнаан.
Тываның күрүнениң аңныыр хайгааралының комитеди бөрүлерниң кештерин хүлээп ап турар. Бөрү аңнаарынга чөпшээрелдиг аңчылардан 1 улуг бөрү кежин 10 муң рубль, бөрзек кежин 3 муң рубль өртекке хүлээп ап турар.
Бистиң корр.
Чурукту интернеттен алган.
“Шын” №3 2026 чылдың январь 29