Ноябрь 23-те Кемерово областың «Шерегеш» спортчу-туризм комплекизинге кышкы хаак сезонун ажыткан фестиваль болуп эрткен. Россияның дүрген хөгжүп орар курордунче хөй туристерни хаара тудар дээш чылдың-на бо хемчегни эрттирери чаңчыл апарган.
“Шерегештиң” девискээринде чаа гостиница комплекстери, ооң иштинде делегей чергелиг объектилер шалыпкын туттунуп турар. Өг-бүлениң дыштанылга программазы калбарып, эмнээшкин болгаш катап тургузуушкун объектилерин тудары көрдүнген. Транспорт болгаш өске-даа инфраструктураның чаартылгазы шапкынчаан, бо чылдың төнчүзүнде Новокузнецкиге делегей чергелиг авиавокзалды ажыдар. “Чаа Шерегеш” турисчи төпче автоорукту тударын планнаан.
Россия Федерациязының Президентизиниң Сибирь федералдыг округта бүрүн эргелиг төлээзи Кузбасска болгаш бүгү Сибирьге аалчылар хүлээп алыр адырның чугулазын чаңгыс эвес удаа онзалап демдеглээн. «Сибирьниң турисчи курлавыры байлак. Күрүне баштыңының даалгазы-биле ажылдаткан национал төлевилелдер оон-даа хөй кижилерге Сибирьни ажыдар инфраструктураны тургузуп турар. Хөй чүүлдер кылдынган – чаа курорттар күчүлүг дыштанылга төптери апарган, ынаар чүгле бистиң чаңгыс чер-чурттугларывыс эвес, а даштыкы туристер хөйү-биле кээп дыштанып турар. Аян-чорукчулар чылдан чылче оон-даа көвүдээринге бүзүрээр мен» - деп, Анатолий Серышев демдеглээн.
Бүрүн эргелиг төлээниң эгелээшкини-биле 2025 чылда “Сибирь мында” деп регионнар аразының туризм төлевилели эгелээр, ол Сибирьниң солун онзагай черлери-биле таныжар арганы бээр. Федералдыг округтуң кожа регионнарынче туристеп чоруксаан сибирьжилерге дыштаныр хүннер турлары - туризмни хөгжүдериниң чугула кезээ апаар.
Кемерово облазының Чазааның парлалга албанының тырттырган чуруктары.