«Шын» 12+

Бүрүн эргелиг төлээ: “Демир-оруктар – Россияның Президентизиниң национал сорулгаларын боттандырар үндезин”

28 февраля 2025
9

Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Новосибирскиге эрткен Барыын-Сибирь демир-оруктарының социал-экономиктиг форумунга киришкен.

Бүрүн эргелиг төлээ күрүне баштыңының салганы национал сорулгаларын күүседиринге демир-оруктар чөленгииш болурун айыткан. Оруктарның чурумчуткан, шынарлыг болгаш тодаргай ажылы чокта, бүдүрүлгелерниң чиге ажыл-чорудулгазын, үлүтпүрнүң хөгжүлдезин бодаары болдунмас деп, бүрүн эргелиг төлээ чугаалаан. Социал ужур-дузалыг болгаш эртем объектилерин тударынга демир-орук комплекизиниң ролюн ол онзалап демдеглээн.

«Россия Федерациязының аңгы-аңгы пунктуларынче чүъктерни сөөртүп тургаш, чоокку үеде депшилгелиг технологияларже үнер стратегтиг инвестиция төлевилелдерин боттандырар чугула сорулгаларны шиитпирлеп турар силер. Ылаңгыя Барыын-Сибирь демир-оруу Новосибирск облазының Кольцово эртем хоорайында “СКИФ” коллективтиг ажыглал төвүнүң тудуунче тудуг материалдарын чедиреринге идепкейлиг киржип турар» - деп, Анатолий Серышев чугаалаан.

2024 чылда Барыын-Сибирь демир-оруу 63,5 млрд ажыг рубльге улуг хемчээлдиг инвестиция программазын чоруткан деп, Барыын-Сибирь демир-орук даргазы Александр Грицай дыңнаткан. Амгы үениң чаа 65 локомотивтери орукче үнген. Пассажирлер аргыштырар адырда көскү түңнелдер чедип алдынган: 2023 чылга деңнээрге, ыраккы болгаш хоорай чоогунуң аргыжылгаларында демир-орук транспортун шилип ап, 43,5 сая кижи ажыл-албанын база аян-чоруун кылган.

Бүрүн эргелиг төлээ БСДО коллективиниң профэвилел организациязының эки ажылын база ужур-чаңчылдарын кадагалап арттырганын үнелеп демдеглээн. «Бөгүнде Барыын-Сибирь демир-оруунуң ажылдакчыларының 36 хуузу – 35 хар четпээн аныяктар. Социал адырыңар хөгжүп, коллективиңер эп-найыралдыг, кижи бүрүзүнүң ажылы экижип келгени көскү-дүр» – деп, ол демдеглээн.

Бүрүн эргелиг төлээ демир-орук хөгжүлдезиниң келир үезиниң дугайында чугаалап тура, чөөн чүкче углай чүък сөөртүлгези өскенинге дүүштүр инфраструктураны чаартырының чугулазын онзалап демдеглээн. Россияның Президентизи 2030 чылга чедир чөөн чүкче углаан демир-оруктарның эрттирилге күчүзүн чылда 210 сая тонна чедир көвүдедирин дааскан. Транссибирь демир-орук болгаш Соңгу чүк далай оруу-биле округтуң мурнуу чүкте үлетпүр адырын тудуштурар немелде демир-орук шугумнарын тудар ажылдарны чорудар херек деп ол чугаалаан.

Сибирьниң орукчуларының төрээн чуртунга ынакшылын база адырның ажылчыннарының фашист эжелекчилерни чылча шаварынга киирген улуг үлүг-хуузун бүрүн эргелиг төлээ демдеглээн. Бо хүннерде демир-орукчуларның аразындан элээн кижи эки тура-биле тускай шериг операциязының зоназында киржип турар. Анатолий Серышев Төрээн чуртунуң салым-хуузунга үлүүн киирип, күш-ажылга харыысалгалыг хамаарылгазын көргүскен ажылдакчыларга болгаш хоочуннарга четтиргенин илередип, бүдүрүкчү болгаш хуузунда чаа-чаа чедиишкиннерни күзээн.

Бүрүн эргелиг төлээ Барыын-Сибирь демир-орук ажылдакчыларынга демир-орук транспортунга ак сеткилдиг ажылы база хөй-ниити аргыжылгазын хандырар ажылды организастаарынга хууда үлүг-хуузу дээш өөрүп четтириишкин бижиктерин тывыскан.

Ада-чурттуң Улуг дайынынга Тиилелгениң 80 чылының бүдүүзүнде демир-орук адырының хоочуннары – бүзээлеткен Ленинградтың чурттакчызы Екатерина Степановна Турецкая база концлагерьге хоругдаттырып турган Надежда Ивановна Молокоедова Анатолий Серышевтиң холундан юбилейлиг медальдарны алган.

ШЫН Редакция