РФ-тиң Президентизиниң Сибирь федералдыг округта бүрүн эргелиг төлээзи Анатолий Серышев Бешки апелляция судунуң даргазы Марина Алексина-биле ужуражып, суд хуралдарының хуралдаар залдарының дериглери-биле танышкан. 2019 чылдың октябрь 1-де Новосибирскиде Бешки апелляция суду бодунуң ажылын эгелээн. Суд эрге-чагыргазының территориалдыг суд органы Сибирь болгаш Ыраккы чөөн чүк федералдыг округтарның составында Россия Федерациязының субъектилеринге тургустунар.
«Бистиң хамаатыларывыстың хоойлу езугаар сонуургалдарын камгалап, чөптүг чорукту хандырары – эрге-чагырга органнарының кол сорулгазы болур. Апелляция болгаш кассация судтарының дузазы-биле ол чедиишкинниг шиитпирлеттинип турар» – деп, Анатолий Серышев чугаалаан.
Бүрүн эргелиг төлээ Бешки апелляция судунуң судьялар составының база аппарадының ажылынга эки үнелелди берген. Ол суд тургустунганындан бээр 12,4 муң херектерни сайгарып көрген.
Серышев амгы үениң дериг-херекселдери-биле дериттинген видеоконференцхарылзааның база өске-даа суд залдарын көрген. Ол ыраккы районнар чурттакчыларының суд чорудуунга киржилгезин хандырар.
Россияда ниити юрисдикцияның беш апелляция база тос кассация судтары ажылдап турар. Сибирь федералдыг округта бешки апелляция суду болгаш шериг кассация суду Новосибирск хоорайда, сески кассация суду Кемерово хоорайда турар.