Бүрүн эргелиг төлээ Красноярскыга Бүгү-россияның студент отрядтар следунуң киржикчилеринге байырны чедирген

Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Красноярск крайга ажылчын сургакчылаашкын үезинде, Бүгү-россияның студент отрядтар чыыжын ажыдып, «Россияның студент отрядтары» деп бүгү-российжи аныяктарның хөй-ниити организациязының регионалдыг салбырларының удуртукчулары-биле ужурашкан.
2019 чылдың Универсиадазын эрттирер кылдыр туткан хоорайның эң улуг хааглыг хемчеглер шөлү – «Платинум Арена Красноярск» хөй ажыл-чорудулгалыг спортчу-хөглээшкин комплекизинге байырлыг ажыдыышкын болуп эрткен. Красноярск крайның студент отрядтарының дайынчылары объектини тудуп үндүреринге үлүүн киирген турган.
Анатолий Серышев слеттиң киржикчилеринге, эксперттеринге, организакчыларынга күрүне баштыңының байыр чедириишкинин дамчыткан. «Россияның студент отрядтарының ачызында муң-муң студентилер болгаш школачылар ада-чурт экономиканың кол адырларынга күш-ажылчы дадыгыышкынны ап, чурттуң үлетпүр бүдүрүлгелеринде болгаш эң улуг тудугларында, аграрлыг болгаш транспорт комплекстеринде, кадык камгалал албан черлеринде болгаш өске-даа адырларда ажылдап турарлар» - деп, медээде бижээн. Үе шапкын өскерлип турар, ынчалза-даа студент отрядтар шимчээшкининиң кол туружу өскерилбээн – коллективтиг болгаш тургузукчу күш-ажыл, Төрээн чуртка ынакшыл болгаш ооң келир үези дээш харыысалга бирги черде бооп арткан деп, бүрүн эргелиг төлээ чугаалаан.
Сибирь федералдыг округтуң девискээринде мындыг улуг хемчээлдиг хемчегниң эртип турары ужур-уткалыг. Анатолий Серышевтиң бодалы-биле алырга, эң нарын объектилерни тударынга, чугула айтырыгларны шиитпирлээринге, улуг ужур-уткалыг хемчеглерни организастаарынга аныяктарга дагзырындан кортпас тус черниң ажыл берикчилери — корпорациялар, тудуг болгаш көдээ ажыл-агый бүдүрүлгелери, туризм болгаш ачы-дуза чедирилге адырлары, өөредилге албан черлериниң төлээлери оларның ажылынга бедик үнелелди берип турары – Сибирьниң студент отрядтарынга бүзүрелдиң бадыткалы.
Бо чылдың күш-ажылчы улдуңунда, Сибирь регионнарындан студент отрядтар федералдыг деңнелдиг чугула объектилер — Новосибирск облазында «Сибирьниң долгандырыглыг фотоннар төвү» коллективтиг ажыглал төвүнүң болгаш Томск облазында «Брест» ядерлиг реактор тудуунга база өске-даа чугула тудуг төлевилелдеринге киришкен. Бүгү-россияның студент эмчи отрядтары округка ажылдааннар. «Бөгүн студент отрядтар дайынчылары үдекчилерниң, вожатыйларның, турисчи ачы-дузаның сезоннуг хереглелин хандырып турар деп бүзүрелдиг чугаалап болур бис» - деп, бүрүн эргелиг төлээ демдеглээн. Бүрүн эргелиг төлээ көдээ ажыл-агый отрядтарының чедиишкиннерин база бедии-биле үнелээн.
Россияның студент отрядтарының удуртулга составы-биле ужуражылга үезинде, бүрүн эргелиг төлээ дайынчыларга өөрүп четтиргенин илереткеш, ылаңгыя аныяктар ортузунга патриотчу кижизидилгеге социал шимчээшкинниң улуг үлүг-хуузун онзалап демдеглээн. «Кандыг-даа байырлал аныяктарның дайынчы хеви болгаш гитаразы чокта солун эвес» - деп, ол чугаалаан. Хөй-ниити организациязының кежигүннери Ада-чурттуң Улуг дайынынга Тиилелгениң 80 чылын болгаш Ада-чурт камгалакчызының чылын демдеглээн хемчеглерге идепкейлиг киржип, тускай шериг операциязының киржикчилериниң өг-бүлелеринге дузалажып, мемориалдарны, тураскаалдарны, чевеглерни чаагайжыткан.
Сибирьжилер «Харлыг десант» деп акция-биле социал чугула объектилер – эмнелге болгаш өөредилге албан черлериниң девискээрлеринде харны аштап, адрестиг дузаны көргүзүп, школачылар-биле профугланыышкынныг ужуражылгаларны эрттирип, спортчу хемчеглерни база концерттерни эрттиргени субирьжилерниң онза чоргааралы апарган. Сибирьден ужукталган ол акцияга 2025 чылда чурттуң 70 ажыг регионнары каттышкан. Федерацияның аңгы-аңгы регионнарындан РСО кежигүннери бүрүн эргелиг төлээ-биле боттарының чедиишкиннерин үлешкен. Анатолий Серышев студент отрядтар төлээлери-биле кады слеттуң делгелге зоналарын болгаш интерактивтиг шөлдерин кезип көрген.
Бүрүн эргелиг төлээ «Квадрат» креативтиг кластерге чедип, «Россияның чогаадыкчы неделязы.Сибирь» үлетпүр дизайнерлериниң төлевилелдер сессиязынга киришкен. Форумнуң ажылында федералдыг болгаш макрорегионалдыг деңнелдиң башкарыкчы эксперттери, Россияның регионнарындан сайгарлыкчылар болгаш удуртукчу командалар чаа арга-дуржулгаларны сайгарып, креативтиг экономика үезинде херек шиитпирлерни саналдаан.