Бүрүн эргелиг төлээ Новосибирск облазының тулган спортчуларынга шаңналдарны тывыскан

Декабрьның 23-те Новосибирскиге областың «Спортчу элита – 2024» спортчу мөөрейиниң тиилекчилеринге шаңналдар тыпсыр байырлыг езулал болуп эрткен.

Сибирь федералдыг округта Россия Федерациязының Президентизиниң бүрүн эргелиг төлээзи Анатолий Серышев киржикчилерге байыр чедирип тура: «Бөгүн мында Новосибирск облазының болгаш бүгү чуртувустуң шылгараңгай хамаатылары чыглып келген, оларның чедиишкиннери бүгү деңнелдиң эрге-чагырга органнарының болгаш спортчу хемчеглерниң организакчыларының демниг ажыл-чорудулгазының ачызында болдунган» — деп, демдеглээн. Ол ышкаш эң-не шылгараңгайларның шылгараңгайларын тып, оларга боттарының күжүнге бүзүрээрин, бар-ла арга-шинектерни ажа бээр оттуушкунну берип турар тренерлерниң ажылын онзалап айыткан. «Бөгүн спорт чокта амыдыралды бодап шыдавас бис» — деп байырлалдың шупту киржикчилеринге чаа-чаа спортчу бедиктерни, чогаадыкчы чедиишкиннерни күзээн.

Эртип турар чылда күш-культура болгаш спортка онзагай чедиишкиннерни чедип алганнарны демдеглээр «Спортчу элита» мөөрей 2011 чылдан бээр эртип турар. Шылгараан спортчулар болгаш тренерлер, ол ышкаш муниципалдыг районнардан специалистер тиилекчи аттарны алырлар. Ол ышкаш эң эки спортчу школаны база спорттуң ойнаар хевирлеринге шыырак командаларны база шаңнаар.
Дайынчы даалгаларны күүседип тургаш кемдээшкин алган тускай шериг операциязының хоочуннары – «Ада-чурт камгалакчыларының кубогу» деп бүгү-российжи комплекстиг күш-культура хемчеглериниң тиилекчилери болгаш киржикчилеринге «Бедик хей-аът» деп тускай шаңналдарны бир-ле дугаар тывыскан.

23 аңгы номинацияга шаңналдарны тывыскан. Бүрүн эргелиг төлээ караа көрбестер аразынга чиик атлетикага делегей чемпиону, делегей чергелиг маргылдааларның болгаш Россия чемпионаттарының хөй дакпыр тиилекчизи болгаш призеру Антон Кулятинге, делегей чергелиг класстың Россияның спорт мастери Арина Сурковага база ооң тренерлери Александр Мартынов биле Сергей Гейбельге тускай шаңналдарны тудускан. Лауреаттар статуэткаларны, дипломнарны база турскаалдыг белектерни алган.