2024 чылдың декабрь 8-те, Россияның Президентизиниң Сибирь федералдыг округта бүрүн эргелиг төлээзи Анатолий Серышев Омск облазынга ажыл-агый аайы-биле чорааш, областың губернатору Виталий Хоценко-биле регионнуң чугула социал-экономиктиг байдалын, мурнады боттандырар угланыышкыннарын чугаалашкан.
Президентиниң даалгаларын болгаш национал төлевилелдерин боттандырганының баш бурунгаар түңнелдерин губернатор таныштырган. 2019 чылдан ол сорулгаже Омск облазынче 116 млрд рубльди чоруткан, ооң 75 млрд федералдыг бюджеттиң акша-хөреңгизи. Регион турум экономиктиг байдалдыг, бюджет киирилделери база үлетпүр бүдүрүлгезиниң индекизи улгаткан.
Виталий Хоценко келир чылда Омск облазының чаа национал төлевилелдерге киржири — мурнады боттандырар угланыышкыннарның бирээзи болурун демдеглээн. Регион федералдыг акшаландырыышкындан 19 млрд рубльге коммунал инфраструктураны эде чаартыр мурнады боттандырар программаже кирген. Ол ышкаш келир чылда аварийлиг эрги бажыңнардан өскээр көжүрер программаның ийиги чадазы эгелээр. Регион бажың тудуунга үлүүн киирген хамаатыларның айтырыгларын, үш арганы ажыглап өскүстерни чурттаар чер-биле хандырарын шиитпирлеп турар: бажыңнарны садып бээри, чуртталга сертификаттарын тыпсыры, улуг инвестиция төлевилелдери-биле тудугжулардан квартираларны дамчыдары.
Регионнуң социал-экономиктиг хөгжүлдезиниң өзүлдезиниң болгаш бизнес-биле чедиишкинниг кады ажылдажылгазының чугулазын бүрүн эргелиг төлээ демдеглээн. «Омск облазында ооң мурнунда-ла чыглы берген айтырыглар бар, чижээ, школаларның чүъгүнүң улуу, ынчалза-даа ол айтырыгларны шиитпирлээрде ажыл-чорудулганың тодаргай программазы болгаш эки шимчээшкини бар. Бо бурунгаарлаашкынны арттырары кончуг чугула: бир эвес бергедээшкиннер тургустунуп кээр болза, бүрүн эргелиг төлээ чериниң аппарады кандыг-даа арга-биле дуза кадарынга белен» — деп, Анатолий Серышев чугаалаан.
Студентилерниң практиказын барымдаалап, шериг-үлетпүр комплекизинге кадрлар белеткээринче онза кичээнгейни угландырган. Тускай шериг операциязының киржикчилерин болгаш оларның өг-бүлелерин деткиири, эмчи дузазының хөй деңнелдиг системазын тургузары – мурнады боттандырар сорулга. Бирээде, клиниктиг эмчи-хирургия төвүнүң чаа оран-савазынга кезиишкиннер чорударынга бюджеттен дашкаар акша-хөреңгини хаара тудар, ийиде – дайын хоочуннарының эмнелгезинде реабилитациялыг катап тургузуушкунну чорудар, үште – Россияның Үлетпүр болгаш садыг-саарылга яамызының Ортопедияда инновациялыг технологиялар төвү-биле кады тургусканы бедик технологиялыг төпке протезтерни кылыр. Шериг албанныглар болгаш тускай шериг операциязының хоочуннары бо арганың ачызында кезип эмнедир, кадыын быжыктырар база протезтер-биле хандыртынар.
Одалга сезонун эрттирериниң болгаш онза байдалдарны болдурбазының айтырыгларын база чугаалашкан. Эрткен чылын областың сугга когараан девискээрлерин катап тургузарының айтырыын сайгарып, регионнуң соңгу кезээнге ам база ындыг нарын үерлээшкинни болдурбазынче угланган профилактиктиг хемчеглер системазын ажылдап кылырының чугулазын демдеглээн.