Бүзүрел чок албан-хаакчыны ажылындан үндүрген

Тожу кожууннуӊ прокуратуразы коррупцияга удур ажыл-чорудулга дугайында хоойлужудулганыӊ күүселдезин хынап турган.

Муниципалитетке албан-хүлээлге күүседири-биле холбаалыг кызыгаарлаашкынны Тожу кожууннуӊ чагыргазыныӊ албан-хаакчылары сагывайн турар дээрзин тодараткан.

Килдис даргазыныӊ албан-дужаалын ээлеп турар албан-хаакчы кижи хары угда ийи албан-дужаалды ээлеп, бир муниципалдыг унитарлыг бүдүрүлгениӊ кол бухгалтеринге кылдыр база ажылдап турар болган. Ажыл берикчизиниӊ чогуур чөпшээрелин албайн, хоойлунуӊ негелдезин хажыдып турган.

Оон аӊгыда, 2022 чылда бодунуӊ ап турар орулгазыныӊ, чарыгдалдарыныӊ дугайында, бодунуӊ болгаш өөнүӊ ээзиниӊ, назы четпээн уругларыныӊ эт-хөреӊгизиниӊ дугайында медээлерни база үндүрүг органнарынга дужааваан.

Муниципалитеттиӊ специализиниӊ албан-дужаалын ээлеп турар база бир албан-хаакчы шак-ла ындыг медээлерни бербээн болган.

Коррупцияга удур эрге-хоойлу хажыдыышкыннарын үүлгеткен Тожу кожууннуӊ чагыргазының албан-хаакчыларын ээлеп турар албан-дужаалдарындан хостааш, бүзүрелин ышкындырганы-биле холбаштыр ажылындан үндүрген.

Республика прокурорунуӊ улуг дузалакчызы С.А. ООРЖАК.
Р. ДЕМЧИК очулдурган.

"Шын" №59, 2023 чылдың август 9