Чырык хүннүң херелинге арны чайнаан,
Чымыш иштиг ажылынга бердинген-даа.
Чырыткылыг келир өй дээш чашты сургаан,
Чыдын чытпас башкыларның шыдамыын-даа.
Өөредип каан ажы-төлдүң чедиишкини,
Өзүп келген салым-чолу, эртем-билии,
Өөңерни оюп эртпейн,
сунган чечээ
Өөрүшкүңер, ажылыңар
түңнели ол.
Базым санай ажылчын-даа, эртемден-даа
Башкы чокта канчап билиг чедип алыр?
– Башкы! Башкы! Мен харыылаайн! – деп көдүрген хол.
Бо хүнде байыр тудуп, йөрээп туру.
2023 ч. октябрь.
***
Мөген-Бүрен ортумак школазының онгу клазынга өөренип турувуста, институтту чаа дооскан төөгү башкызы Вячеслав Опеен бисти хүлээп алгаш, доостурган.
Кады чоруп, эдеришкен,
Кайгамчыктыг башкывыс бар.
Онгу класска турувуста
Орустаар башкы келген...
Адын-сывын адай бээрге,
Ак-ла сөөктүг Оюн болган.
Чаңгыс-даа тыва сөс билбес,
Чаржынып-даа турдувус-ла.
Көдээ черде доозукчуларның,
Көрбес, кылбас чүвези чок.
Башкывысты ол-ла чылын,
"Башкылап" турдувус-даа,
Столдарны кожа салгаш,
Стол теннизин өөреттивис,
Тыва дылда бистен артык,
Дыка солун чугаалай берген.
Аажы-чаңы оожум-топтуг,
Ажылынга кызымак ,
Башкывыстың сөзүн дыңнап,
Багай эвес доостувус.
Дээди сургуул чериндиве,
Деткип, сургап өөреткен,
Аныяк башкывыс Оюн-биле,
Аралажып, эптиг чор бис.
Марита ИРГИТ,
төөгү башкызы Вячеслав Оюновичиниң баштайгы өөреникчилериниң бирээзи, Тываның чогаалчылар эвилелиниң кежигүнү.
Февраль. Пар чылы.
«Шын» №76 2023 чылдың октябрь 7