2025 чылдың апрель 21-ден эгелээш zagorodsreda.gosuslugi.ruплатформада 2026 чылда «Чурттаарынга таарымчалыг хоорай хүрээлеңи» федералдыг программага киржир девискээрлерни тодарадыры-биле, онлайн бадылаашкын эгелээн. Тываның чурттакчы чону тергиин төлевилел дээш үнүн 2025 чылдың июнь 12-ге чедир берип болур.
Онлайн бадылаашкында республиканың 19 кожуунундан 69 төлевилел киржип турар. Бо хүнде Улуг-Хем кожууннуң төлевилели дээш 8, Кызыл кожууннуң — 7, Кызыл хоорайның 6 кижи үнүн берген. Республиканың 69 төлевилелиниң 30-и келир чылгы федералдыг программага киржир.
Онлайн бадылаашкынга 14 хардан өрү хамааты бүрүзү киржир эргелиг.
Күрүнениң ачы-дуза порталы таварыштыр, тус черлерде волонтёрларның дузазы-биле азы zagorodsreda.gosuslugi.ru. платформазын таварыштыр соңгуп болур.
Бо хүнден эгелээш республика девискээринде 300 ажыг волонтёрлар онлайн бадылаашкынга дузалажыры-биле ажылдап эгелээн. Оларның хөй кезии дуржулгалыг волонтёрлар.
Эрткен чылгы бадылаашкынның түңнели-биле, 2025 чылда Тываның девискээринде 28 хөй-ниити дыштаныр черлерин чаагайжыдып эгелээр. Оларның аразынче ТШО киржикчилеринге тураскааткан культурлуг комплексти Улуг-Хемниң эриинге тудары планда көрдүнген. Оон аңгыда, Дөгээ даанче үнер черниң чаагайжыдылгазы база ынаар кирип турар.
Бистиң корр.
Чурукту интернет четкизинден алган.
«Шын» №15 2025 чылдың апрель 24