Таарымчалыг хоорай хүрээлеңи
Бадылаашкынга идепкейлиг киржиңер!
«Шын» солуннуң эрткен үндүрүлгезинде «Таарымчалыг хоорай хүрээлеңи» федералдыг төлевилел дугайында, ооң ачызында хоорай, суурларның чаагайжыттынып эгелээнин, бо чылын кандыг онзагай объектилерниң аңаа киржирин база канчаар бадылаарының дугайында тайылбырлап бижээн бис. Ынчангаш солуннуң арыннарынга кожууннар аайы-биле төлевилелдерни таныштырып эгелээнивис бо.
Бөгүнгү үндүрүлгеде республиканың мурнуу чүгүнде Тес-Хем болгаш Эрзин кожууннарда кандыг онзагай төлевилелдер барын таныштырып көрээл. Бо ийи кожууннуң киириштирип турар төлевилелдери колдуунда өг-бүлелер дыштаныр, хостуг үезин шын ажыглаарынга таарымчалыг спортчу шөлдер тургузары, чаагайжыдары көрдүнген.
Тес-Хем кожуундан бо чылын хөй-ниити девискээрлерин чаагайжыдар 3 төлевилел киржип турар. Кожуун төвү Самагалдай суурнуң Дружба кудумчузунга спортчу оюннар ойнаар универсалдыг шөлдү тургузарын планнап турар. Аңаа ооң мурнунда тус чер чурттакчыларының боттарының күжү-биле кылып алганы уруглар ойнаар шөлчүгежи турган. Амгы үеде ооң байдалы эргижирээн, кижилер дыштаныр арга чок апарган. Ук микрорайоннуң чурттакчылары кожуун чагыргазынга ол черни чаартып, чаагайжыдып бээрин дилээн. Шөлдү долгандыр херимнээш, резин, бетон база элезин чадыглар салыры, ол ышкаш сандайлар, бок төгер савалар, чайганыыштар, спортчу комплекс, баскетбол щиди, биче футбол хаалгалары, хол бөмбүүнүң баганалары, фонарьлар тургузары көрдүнген. Ук төлевилел дээш бо хүнде 33 кижи бадылаан.
Ийи дугаар төлевилел – Самагалдайда Ч. Кидиспей аттыг дыштанылга парыгын чаагайжыдары. Өг-бүлелер дыштаныр паркка спортчу шөл, сандайлар, бок төгер савалар дээш өске-даа чүүлдерни тургузар. Ол дээш 29 кижи үнүн берген.
Тес-Хем кожууннуң сумуларының аразында эң-не хөй чурттакчылыг Берт-Дагга хөй-ниити девискээрин чаагайжыдарын планнап турар. Ук сумуда бо хүнде уруглар ойнаар чаңгыс-ла шөл бар. Ынчангаш берт-дагжылар тус чер чагыргазындан ам бир шөл кылдырып бээрин дилээн.
Аңаа база-ла резин чадыглар, баскетбол, футбол щиттери, чайганыыштар, карусель, уруглар ойнаар база спортчу комплекстер, теннис столу, тренажерлар, сандайлар, бок төгер савалар тургузар. Ол ышкаш бо шөлдү ногаанчыдар база девискээрин чырыдар. Бо хүнде 56 кижи бадылаан.
Дараазында Эрзин кожуунну сонуургап көрээл. Эрзинчилер бо чылын 2 төлевилелге киржип турар. Бир дугаарында кожуун төвүнде Комсомольская кудумчузунда паркты чаагайжыдар сорулгалыг. Ук паркты каш янзы шөлдерге чарып каан: кол шөл, уруглар ойнаар шөлчүгеш, дыштанылга зоназы, воркаут шөл (кудумчу гимнастиказынга сонуургалдыг кижилерге көрдүнген дериг-херекселдер), «Эрзинге ынак мен» деп тураскаал, мани хүртүзү. Амдыызында 38-ле кижи бадылаан.
Аныяктар болгаш элээдилерниң хостуг үезин спортче хаара тудар сорулга-биле ийи дугаар төлевилелди тургускан. Ол дээрге Эрзинниң Кидиспей кудумчузунга Найырал аттыг девискээр-дир. Аңаа биче футбол, хол бөмбүү, баскетбол шөлдери база бичии уруглар ойнаар черлер турар (8-ле кижи бадылаан).
Бо төлевилелдерниң кайызы хөй үн алырыл, ол төлевилелди келир чылын акшаландырар. Май 30-ге чедир бадылаашкын уламчылаар. Ынчангаш кижи бүрүзү чурттап турар чериниң чаагайыжыдылгазы дээш хамааты хүлээлгезин күүседип, онлайн-бадылаашкынга идепкейлиг киржирин кыйгырып тур бис.
Алдынай АРАКЧАА.