"Коронавирус" Тывада база тарап турар, хөй кыдаттарны Кызылдың болгаш кожууннарның улуг эмнелгелеринге тарадып чыттырар дээн-дир..." дишкен дидир-дидир чон ортузунга дыргын тарай берген. Харын-даа мырыңай, эмчилерде чыттырып алган кылдыр чугаалажып турар.
Тыва Республиканың "Роспотребнадзор" албан чери чонга тайылбыр ажылдарын чорудуп, дыңнадыышкыннарны кылып турбуже, чон ортузунга дүвүрээзин үндүрүп турар медээлер шын эвес, "хоп чугаалар" дээрзин дыңнаттывыс.
Бо хүнде Шагаан-Арыгның төп эмнелгезиниң Халдавырлыг аарыглар салбырында 16 бичии уруглар: 2-зи ижин аарыындан, артканнары респираторлуг вирустуг инфекциядан (ОРВИ) эмнедип чыдар. Бо хүнде эмнедип турар кижилерниң аразында берге байдалдыг аарыг кижилер чок. Халдавырлыг аарыглар салбыры болганда, эмчиде чытпайн турар кижилер кайы хамаанчок ынаар үнүп-кирип болбас дээрзи билдингир. Халдавырлыг аарыглар салбырының улуг эмчизи Чаяна Шолбан-ооловна Орус-оолдан чон ортузунда тарай берген медээниң дугайында ылавылап айтырарывыска, ол мынчаар харыылаан: "Эрткен пятницада ТР-нин Кадык-камгалал яамызындан бистиң салбырның ажылын, эмнедип чыдар кижилерниң, грипп болгаш ОРВИ аарыгларының кожуунда байдалын хынап кээп чораан. Кандыг-даа кыдат омак-сөөктүг кижилер бистиң салбырда эккеп чыттырбаан".
ТР-ниң "Росхереглелхайгаарал" албан чериниң кол эмчизиниң сүмелээни-биле болгаш өөредилге албан черлериниң база кожуунда төп эмнелгениң бичии уруглар эмнээр салбырының айыткан сан-чурагайларынга даянып, назы четпээннер ортузунда грипп, ОРВИ аарыглары тарап турарын барымдаалааш, Шагаан-Арыг хоорайның №1, 2, гимназия школаларында карантинни чарлаан. Өске школаларда байдал чүгээр болганы-биле чүгле хоорай школаларында карантин чарлаттынган. Бир эвес тус черлерде назы четпээннер ортузунда аарып турар кижилер хөйү-биле демдеглеттинген болза, ону хүн бүрүде хыналдага ап, чогуур черлерже дыңнадыр. Аарыг халдавырлыг болганда, дузалал масканы кедер болгаш арыг-силигни сагыыр ужурлуг.
Кожуунда бактаап турар 3 аптека бар. Бо хүн аптекаларга чедип, камгалал маска бар-чогун ылавылап көрдүвүс. Саян-Шушенск кудумчузунун 3 дугаар бажыңда "Форте" аптекада (эргелекчизи А.Х.Ондар) маскалар чок, бо чоокку үеде эккелбес деп харыылады. Дружба кудумчузунда 59 дугаар бажыңда "Гелиос" аптекада (эргелекчизи С.К.Долдуг-Эник) камгалал маскалар 7000 хире бар. Бир хапта 5 маска чоруур, өртээ 30 рубль. Хуу сайгарлыкчы У.М.Өлчейниң аптеказында (Кечил-оол кудумчузу) 10 муң хире маска бар. Чаңгыстап садарга 5 рубль, хапта 5 масканың өртээ 25 рубль, хаптап каан 50 масканы 250 рубльге садып турар.
Кожууннуң төвүнде карантин чарлаттынганы-биле хөй кижилер киржилгелиг культура-массалыг, спортчу хемчеглерни эрттирерин февраль 10-дан 17-ге чедир кызыгаарлаанын дыңнаттывыс.