Бай-Тайга кожуунда мал согар цех ажыттынган

Бай-Тайга кожууннуң төвү Тээли суурга эът болбаазырадыр цехтиң ажыдыышкыны болуп эрткен. Тываның Чазааның деткимчезин чаалап ап шыдаан аныяк, эрес-шудургу хууда сайгарлыкчының ачызында кожууннуң чонунуң үрде манааны бүдүрүлге ажылдай берген.

“Бо төлевилелдиң ачызында 9 сая рубль акшага деткимчени алгаш, мал согар цехти ажыдар аргалыг болдум. Тываның Чазаанга, Бай-Тайга кожууннуң чагыргазынга мени деткээни дээш улуу-биле өөрүп четтирдим. Малчыннар ам маңаа келгеш, малын аайлап ап болур апарганы оларга база улуг деткимче-дир” — деп, хууда сайгарлыкчы Начын Баавыл үлешкен.

Бо хүнде Бай-Тайга кожуунда 125 хире муң баш шээр мал болгаш 12 муң ажыг баш бода мал бар. Чагырга даргазы ветеринарлыг негелделер езугаар малды тускай пунктуларга аайлап белеткээр ужурлуг дээрзин демдеглээн. Бүдүрүлгеге база социал адырга ажыглаттынар бараан аймаа доозазы шак ындыг цехтен келир ужурлуг, ынчан ук бараанның шынары база айыыл чок чоруу чогуур негелделерге дүгжүр болур.