Бай-Тайга кожууннуң эрттирип турары «Мөңгүн кержек» фестивалынга бо чылын 100 ажыг ус-шеверлер киржир.
Фестивальга белеткел ажылдары бо хүнде кандыг чоруп турарын Бай-Тайга кожууннуң культура эргелелиниң специализи Сайын Күжүгет дыңнаткан: «Бо чылын фестивальга республиканың бүгү кожууннарындан 81, Алтайдан – 6, Хакасиядан – 2 ус-шевер киржир. Алтайдан кээр шеверлер хөм, кидистен кылган ажылдарын, а хакас өөрлеривис хамнар дүңгүрлерин делгээр. Тываның барык шупту кожууннарындан шеверлеривис 10 аңгы номинацияга киржир чагыгны киирген. Ол дээрге бо хүнде кирген чагыглар-дыр, киржикчилер саны ам-даа немежир.
Үш дугаар эртип турар фестиваль сөөлгү ийи чылда хамчыктыг аарыгның уржуундан болбаан. Бир дугаар чылын республика иштинге, дараазында чылын делегей чергелиг эрттирген бис. Ынчан Моолдуң Сенгелден, Новосибирск болгаш Красноярск хоорайлардан ус-шевер мастерлер кээп киришкени кайгамчык болган. А бо чылын регион чергелиг эрттиреривис бо».
Фестивальдың программазында июнь 18-те Бай-Тайга кожууннуң Кызыл-Даг сумузунга делгелге-ярмарка, мастер-класстар, аныяк чурукчулар болгаш шеверлер аразынга «Арт-баттл» мөөрейи дээш өске-даа культурлуг хемчеглер бар. Ол ышкаш июнь 21-де Тыва Үндезин культура төвүнге эртем-практиктиг конференцияны эрттирер.
Фестивальдың организакчылары Бай-Тайга кожууннуң культура эргелели болгаш Тыва үндезин культура төвү.
/ Бистиң корр.