Бай-тайгажылар-биле ужуражылгалар

Бай-Тайга кожууннуң чурттакчылары-биле ужуражылга болган. Аңаа кожууннуң удуртукчулары, Дээди Хуралдың депутаттары киришкен.

Бай-Тайга кожууннуң хөгжүлдезинге хамаарышкан планнарны сайгарып чугаалашкан. Ол ышкаш бир дугаарында шиитпирлээри негеттинип турар нарын айтырыгларны база тодараткан. Оларның аразында суурнуң специалистеринге чурттаар оран-сава тудуу, Тээли суурда амгы үениң чаа школазы, школалар болгаш эмнелгелерниң капитал септелгези, турисчи маршруттарны ажыдары, биче болгаш ортумак сайгарлыкчы чорукту деткиири хамааржыр.

Дээди Хуралдың депутады Ульяна Монгуш бүдүн кожуунну амданныг, чаагай хлеви-биле хандырып турар “Свежий хлеб” пекарняның ээзи Уран Чүлдүм-биле ужурашкан.

Бүдүрүлге чериниң удуртукчузунуң чугаалап турары-биле алырга, хүнде 1000 ажыг хлеб кылыгларын бүдүрүп үндүрүп турар. Ынчалза-даа ол чурттакчы чонга чедишпес, бүдүрүлге черин ам-даа улгаттырар херек. Бир дугаарында чонну бүрүнү-биле хандырыптар хире улуг, делгем хлеб быжырар черниң чедир туттунмаан оран-савазын тудуп доозар.

“Тудугну доозары-биле “Свежий хлеб” бүдүрүлге черинге акша-хөреңги деткимчези херек. Бир дугаарында бүгү-ле чогуур черлерже дуза дилээрин кызыдар бис” – деп, Тыва Республиканың Дээди Хуралының (парламент) депутады Ульяна Монгуш демдеглээн.

Ол ышкаш Ульяна Монгуш капитал септелге чоруп турар школага база кожуун эмнелгезинге четкен. “Капитал септелгени чедиишкинниг доозары-биле, Сүт-Хөл, Чөөн-Хемчик, Эрзин кожууннардан шыырак дээн тудугжулар командазы чыглып келген. Республикада эң-не тергиин каңнакчы бригада ында ажылдап турар. Олар шупту Бай-Тайга кожуундан. Тудугну тус черниң тудугжузу Ужар-оол Иргит удуртуп турар” – деп, депутат демдеглээн. Август 20-ге чедир школаны бүрүнү-биле чаартыр сорулга салдынган.

Ульяна Монгуш оон ыңай Бай-Тайга кожууннуң эмнелгезинде база капитал септелге чорудуп турар хүлээникчи тудуг организациязының удуртукчузу Ужар-оол Иргиттиң шынарлыг ажылын демдеглээн. Ооң чугаалап турары-биле алырга, капитал септелге адакталып турар.

Ч. СААЯ белеткээн.
Чуруктарны интернеттен хоолгалаан.

"Шын" №54 2024 чылдың июль 20