Байлак дуржулганы алган

Июнь 1-де «Ада-чурттуң камгалакчылары» күрүне фондузу Россияның өске регионнарында дег, Тыва Республикада база ажылдап эгелээнинден бээр таптыг-ла бир чыл болган.

Артыш Монгуш салбырның тургустунганындан бээр ында социал координатор болуп ажылдап турар. Ол ышкаш Артыш «Тываның буянныг чүректери» деп аныяктар шимчээшкининиң даргазы. Бодунуң үежилери студент аныяктар-биле кады хоочуннарга болгаш назылап кыраан, чааскаан арткан улуска дузазын чедирип турар.
2022 чылдың сентябрьда долу эвес мөөңнелгениң үезинде Артыш өске волонтерлар-биле кады шериг албанныгларның өг-бүлелеринге дузаны уштап-баштап эгелээн, чүге дизе күрүне фондузунга ажылының эгези болур ол үеде фондунуң ажылының уг-шиин, тускайлаң талаларын билир апарган.

«Ада-чурттуң камгалакчылары» күрүне фондузунга бир чыл ажылдың дургузунда байлак арга-дуржулганы чаа адырларга алганымны, дуза чедириксээн улузумнуң саны көвүдээнин демдеглексээр-дир мен.
Тускай шериг операциязының бир киржикчизиниң бажыңы өрттенген. Аңаа оглу, ийис оолдар база өөнүң ишти турган. Өг-бүле реанимацияже кирген. Божуу-далаш дуза ол үеде херек апарган. Күрфондунуң удуртулгазы-биле кады өг-бүлеге чедип, чүү чугула херек дээрзин билип алдывыс. Когараан өг-бүлеге эргежок чугула ханны чыып, шалыпкын дузалашкан бүгү волонтерларга өөрүп четтиргенимни илередир-дир мен» – деп, Артыш Монгуш чугаалады.

Артыш дайынга мөчээн дайынчыларның болгаш дайынчы хөделиишкиннерниң хоочуннарының 100 өг-бүле кежигүнүн хайгаарап турар. Күрфондуга ажылдап келген үениң дургузунда янзы-бүрү айтырыгларны шиитпирлешкен – чашты уруглар садынга тургузарындан, сургуулду өөредилгениң бюджет хевириниң хүндүскү салбырынче шилчидеринден эгелээш, инвалид болган хоочуннуң эмнээшкининге, реабилитациязынга чедир.

А. ХЕРТЕК белеткээн.
«Шын» №41 2024 чылдың июнь 5