Кадыкшылга сезону эгелээр мурнунда «Байлак» лагериниң электри шугумун чаарткан. ТР-ниң Күш-ажыл болгаш социал политика яамызының ведомствозунда турар лагерьге 22 бетон чагыларны тургускан. 280 метр быжыг болгаш шынарлыг «Сибкабель» деп удазынны шөйген.
Лагерьниң девискээринде, хөй кижи чыглыр черлерде, 11 лампаны тургускан: чурттаар корпустарда, столовая, шөлчүгештер болгаш кылаштаар чиңге оруктарда.
«Эрги ыяш чагыларда удазыннар чиңге турган. Улуг хат хадыырга, электри өжүп каар, ону эде кылып турда, манаар апаар. Ам лагерьниң уруглары болгаш башкылары таарымчалыг байдал-биле хандыртынган» — деп, «Байлактың» ажылдакчылары өөрүп чугаалаан.
«Бастион» КХН-ниң тудугжулары бо ажылды 4 хонук дургузунда кылган. Ол ышкаш бо компания Чагытай хөлдүң эриинде өске-даа лагерьлерниң («Чагытай», «Металлург» болгаш «Орленок») электри шугумнарын чаарткан.
ТР-ниң Күш-ажыл болгаш социал политика яамызының медээзинден.