БАЙЫР ЧЕДИРИИШКИНИ

Хүндүлүг чаңгыс чер чурттугларым!
Республика хүнү-биле!

Тываның чурттакчылары чоргаарланыр маадырлыг төөгүлүг, үнелиг культуралыг болгаш чаагай чанчылдарлыг. Даш-чонукчуларывыстың ажылдары, ыяңгылыг хөөмей-сыгыдывыс, ыры-хөгжүмүвүс бөмбүрзекте билдингир. Тываның төөгүзүнүң арыннарынче аттарын киир бижиткен чаңгыс чер чурттугларывыс онза чоргааралды оттуруп турар. Ол дээрге эрес-маадыр дайынчыларывыс, олут олурбас малчыннарывыс, уран сөстүг чогаалчыларывыс-тыр. Билдингир чурукчуларывыска болгаш спортчуларывыска база чоргаарланыр бис.

Республикавыстың амгы төөгүзү – шапкын хөгжүп турар регионнуң төөгүзү-дүр. Ийе, амгы үеде чурт-биле деңге шыңгыы шылгалдалыг чылдарны эртип тур бис. Ынчалза-даа чуртувус, а ынчап кээрге республикавыс база берге байдалдан төлептиг үнүп, шаптараазыннарны ажып тиилээр. Бис төрээн чуртувуска, республикавыска чүгле ынак эвес, а херек үеде ону камгалап база шыдаар бис.

Тыва Республика аңгы-аңгы адырларда чедиишкиннерлиг. Төрээн черивис чылдан чылче хөгжүп турар. Бистиң амгы сорулгавыс – депшилгелиг маңывысты суларатпазы болур. Бо бүгү чедиишкиннер силерниң ажылгыр, кызымак чорууңар ачызында чедип алдынган. Ол дээш бис, эрге-чагырга органнары, силерге өөрүп четтиргенивисти илередип турар бис.

Шынап-ла, республикада хөй-ле бүдүрүлгелер, болбаазырадылга черлери боттарының дериг-херекселдерин чаартып турар. Бедик технологиялыг бүдүрүлге черлери ында-мында көстүп келген. Тудуг, орук, транспорт, туризм дээш өске-даа адырларында эки өскерилгелер көскү. Социал адырда он-он улуг-биче төлевилелдер үре-түңнелдиг боттанып турар. Бо чедиишкиннер Тываның Россияга эки тура-биле каттыжып киргениниң 80 чыл оюнга белээвис болур.

Даарта Тыва Республикада Парламентаризм хүнүн база демдеглээр бис. Чүге дизе 103 чыл бурунгаар республиканың бирги Конституциязын тыва чоннуң баштайгы Тургузукчу хуралы хүлээп алган. Ынчангаш бо хүннү каш чыл бурунгаар чарлап тургускан бис.

Бо байырлалдар-биле силерге, чаңгыс чер чурттугларывыска, Дээди Хуралдың (парламентиниң) депутаттары изиг байырывыс чедирип тур бис. Каң дег кадык, аас-кежиктиг, ажыл-агыйыңарга чедиишкиннерлиг болуңар!

ТР-ниң Дээди Хуралының (парламентизиниң) Даргазы К. Даваа.

"Шын" №61 2024 чылдың август 14