Байыр чедириишкини

Хүндүлүг чаңгыс чер чурттугларывыс!

Тыва чонувус ынак байырлалы Шагаа моорлап келди. Аңаа өөрүп, Силер-биле чолукшуурун чөпшээреп көрүңер!

Эрги чылды ажыг кыштың хыраа, соогу-биле үдээли, а Чаа чылды – Шагааны аас-кежик, чедиишкиннер хөй-ле болзун деп йөрээл-биле уткуулу. Онза байырлалда ал-бодуңарга кежик-чолду, кадыкшылды, ажыл-ижиңерге чедиишкиннерни, а өг-бүлеңерге чедимчелиг амыдыралды сеткилимден күзеп олур мен.

Бо үеде бистиң хамык сагыш-сеткиливис тускай шериг операциязында киржип турар чаңгыс чер чурттугларывыс-биле кады. Бистер Тываның дайынчыларынга чүгле экини күзеп турар бис. Олар амгы Россияның төөгүзүнде туруп көрбээн улуг хосталгалыг даалганың боттандырыкчылары. Бо чылгы Шагаа байырлалының буян-кежиктиг мөргүл номнары оларның кадыкшылынга, онча-менди чоруунга, тиилелгелиг чанып кээринге тураскааткан болур. Төрээн республиказының, тыва чонунуң, чоок кижилериниң дугайында сактыышкыннары, чырык хөөннери оларның сеткилдерин чылдып чорзун!

Ыяш олуттуг ногаанзымаар Улу чылында авыралдыг Тыва черивиске амыр-тайбың амыдырал доктаарын, республикавыс улам хөгжүп сайзыраарын база Силерниң чаагай күзелдериңер ыяап-ла бүдерин күзедим!

Хүндүткел-биле, ТР-ниң Дээди Хуралының (парламентизиниң) Даргазы К. ДАВАА.

“Шын” №10 2024 чылдың февраль 10